ԵՄ արտգործնախարարները կքննարկեն Վրաստանի եվրաինտեգրման դադարեցման հարցը

Գերմանիայի, Ֆրանսիայի և Լեհաստանի ԱԳ նախարարները համատեղ հայտարարությամբ իրենց մտահոգությունն են հայտնում «Վրացական երազանքի»՝ ԵՄ անդամակցության բանակցությունները չշարունակելու և մինչև 2028 թվականը ԵՄ ֆինանսական աջակցությունից հրաժարվելու որոշման առնչությամբ։ Նրանց կարծիքով, դա ակնհայտորեն հակասում է վրաց ժողովրդի եվրոպական նկրտումներին, ինչպես նշված է Վրաստանի Սահմանադրության մեջ։

«Կառավարության ձեռնարկած քայլերը Վրաստանին դրեցին արտաքին և ներքին անկայունության առաջ։ Մենք ընդգծում ենք վրաց ժողովրդի ժողովրդավարական և եվրոպական նկրտումներին աջակցելու մեր վճռականությունը։

Մենք խստորեն դատապարտում ենք խաղաղ ցուցարարների նկատմամբ ուժի անհամաչափ կիրառումը, ինչպես նաև ընդդիմության և լրատվամիջոցների ներկայացուցիչների թիրախավորումը։ Մենք դատապարտում ենք ընդդիմադիր կուսակցությունների և քաղաքացիական հասարակության գրասենյակների խուզարկությունը, քաղաքական ընդդիմության անդամների ձերբակալությունը և կոչ ենք անում անհապաղ ազատ արձակել նրանց։ Հիմնական իրավունքները, ներառյալ խաղաղ հավաքների և արտահայտվելու ազատությունը, պետք է պաշտպանվեն Վրաստանի Սահմանադրությանը և միջազգային պարտավորություններին համապատասխան։

Կոչ ենք անում «Վրացական երազանքին» թուլացնել լարվածությունը և բացել ներառական երկխոսություն բոլոր քաղաքական ուժերի և քաղաքացիական հասարակության ներկայացուցիչների հետ։

Հիշեցնենք, որ 2024 թվականի սկզբից «Վրացական երազանքի» գործողությունների ընթացքը Եվրամիությանն անդամակցելու գործընթացի փաստացի կասեցումն էր, որն իր հերթին հանգեցրեց Վրաստանի հետ մեր հարաբերությունների վատթարացմանը։

Մենք այս հարցը կբարձրացնենք Արտաքին հարաբերությունների խորհրդի հաջորդ նիստում, որպեսզի համապատասխան միջոցներ ձեռնարկենք ԵՄ մակարդակով, ինչպես նաև դիտարկենք «Վրացական երազանքի» գործողությունների ազդեցությունը մեր համապատասխան երկկողմ հարաբերությունների վրա»,- ասված է Վայմարի եռանկյունու հայտարարության մեջ։

Ոչ լեգիտիմ վարչապետ Իրակլի Կոբախիձեն նոյեմբերի 28-ին հայտարարեց, որ Վրաստանը մինչև 2028 թվականի վերջը օրակարգ չի մտցնի ԵՄ անդամակցության շուրջ բանակցություններ սկսելու հարցը և կհրաժարվի ԵՄ բյուջեի ֆինանսավորումից։ Ինչպես ասել է Կոբախիձեն, եվրոպացի քաղաքական գործիչներից և բյուրոկրատներից ոմանք շանտաժի են ենթարկում Վրաստանին բանակցություններ սկսելու թեմայով. նրանք Վրաստանից խնդրում են «ձեռնարկել միայն այն քայլերը, որոնք նշանակում են արժանապատվությունից հրաժարվել»։ «Վրացական երազանքի» որոշմանը հաջորդել է զանգվածային բողոքի ցույց Թբիլիսիում և շրջաններում, որը շարունակվում է արդեն ինը օր։