Էրդողանի խոսքով՝ Սիրիայում սպանվել է «Իսլամական պետության» առաջնորդ

«Այս անձը երեկ չեզոքացվել է թուրքական ազգային հետախուզության գործողության արդյունքում»,- ապրիլի 30-ին թուրքական լրատվամիջոցներին տված հարցազրույցում ասել է Էրդողանը, նշելով, որ ալ-Քուրեյշը երկար ժամանակ հետապնդվել է հետախուզության կողմից։

«Մենք առանց բացառության կշարունակենք պայքարել ահաբեկչական կազմակերպությունների դեմ»,- ասել է Ռեջեփ Թայիփ Էրդողանը։

Աբու Հուսեյն ալ-Քուրեյշին ահաբեկչական կազմակերպության առաջնորդ է ընտրվել 2022 թվականի նոյեմբերին այն բանից հետո, երբ նրա նախորդը՝ Աբու Հասան ալ-Հաշիմի ալ-Քուրեյշին սպանվել է Սիրիայի հարավում հատուկ գործողության ընթացքում։

Աբու Բաքր ալ-Բաղդադիի գլխավորած «Իսլամական պետությունը» (ISIS/Daesh) 2014 թվականին վերահսկողության տակ է վերցրել Սիրիայի և Իրաքի հսկայական տարածքները, որտեղ միլիոնավոր մարդիկ են ապրում և հռչակել իսլամական խալիֆայություն: Ահաբեկչական կազմակերպությանը միացել են հազարավոր մարդիկ տարբեր երկրներից, այդ թվում՝ Վրաստանից։ ISIS-ը իր ազդեցությունը կորցրել է ԱՄՆ-ի կողմից աջակցվող ուժերի, ինչպես նաև Իրանի, Ռուսաստանի և տարբեր զինված խմբավորումների կողմից աջակցվող սիրիական ուժերի գործողություններից հետո: Ալ-Բաղդադին ոչնչացվել է 2019 թվականին՝ ԱՄՆ-ի կողմից իրականացված գործողության արդյունքում։

Թուրքիան «Իսլամական պետությունը» ահաբեկչական կազմակերպություն է հայտարարել 2013 թվականին: Ըստ կառավարական լրատվամիջոցների, դրանից հետո ահաբեկչական խմբավորումները մի շարք ահաբեկչություններ են կազմակերպել երկրում, որոնց արդյունքում զոհվել է ավելի քան 300 մարդ, հազարավոր մարդիկ վիրավորվել են։ Ի պատասխան դրանց՝ Թուրքիան հակաահաբեկչական գործողություններ է իրականացրել ինչպես իր տարածքում, այնպես էլ երկրի սահմաններից դուրս։

Չնայած խոշոր տարածքների կորստին, «Իսլամական պետության» գրոհայինները շարունակում են հարձակումներ իրականացնել Սիրիայում և այլուր:

Այս թեմայով՝

ՊԱԾ-ի տվյալներով՝ ձերբակալվել է «Իսլամական պետություն» խմբավորման առաջնորդ Մալխազ Պաքսաշվիլին