Երեք ամսում «Վրացական երազանքին» գրեթե 9․5 մլն լարիի հանգանակություն են կատարել

Ընդդիմադիր կուսակցությունների հանգանակությունները հետևյալն են՝ «Լելոն Վրաստանի համար»՝ 330 305 լարի, «Միացյալ ազգային շարժում»՝ 241 091 լարի, Շոթա Շալելաշվիլիի «Սերունդները հանուն Վրաստանի»՝ 101 789 լարի, «Հանուն Վրաստանի»՝ 7 665 լարի, «Եվրոպացի սոցիալիստներ»՝ 5 450 լարի, «Հանուն ժողովրդի»՝ 5 300 լարի, «Պահպանողական շարժում»՝ 2 875 լարի, «Էլենե Խոշտարիա - Դրոա»՝ 2504 լարի, «Վրաստանի լեյբորիստական ​​կուսակցություն»՝ 2 371 լարի, «Եվրոպական Վրաստան»՝ 438 լարի:

Կուսակցական նվիրատվություններն ուսումնասիրվել են «Թրանսփարենսի Ինթերնեշնլ-Վրաստան»-ի կողմից։ Ինչպես պարզվել է, երեք ամսում «Վրացական երազանքին» գումար է նվիրաբերել 284 մարդ, մնացած բոլոր կուսակցություններին՝ 130։

Իշխող կուսակցության դոնորների հետ առնչություն ունեցող 11 ընկերություններ 2023 թվականի երկրորդ կիսամյակում ավելի քան 200 մլն լարի արժողությամբ մրցույթներ են հաղթել։ 2013 թվականից ի վեր նույն ընկերությունները շահել են ավելի քան 1․7 միլիարդ լարիի տենդերներ։

Օրինակ՝ 2023 թվականի չորրորդ եռամսյակում «Անագի» շինարարական ընկերության հետ առնչվող ութ անձ ընդհանուր առմամբ 425 հազար լարի է նվիրաբերել «Վրացական երազանքին», մինչդեռ նույն ժամանակահատվածում ընկերությունը շահել է ավելի քան 3 միլիոն լարիի տենդեր։ «Գզա» ՍՊԸ-ի 100 տոկոս բաժնետոմսերի սեփականատեր Գիորգի Ճղոնիան և ընկերության տնօրեն Մալխազ Դումբաձեն նոյեմբերի 13-ին և 15-ին «Վրացական երազանքին» նվիրաբերել են ընդհանուր առմամբ 75 հազար լարի, իսկ «Գզա»-ն շահել է վեց մրցույթ նույն ժամանակահատվածում, որի ընդհանուր արժեքը կազմել է 175 մլն լարի։

Նույն ժամանակահատվածում ընդդիմադիր կուսակցությունների դոնորների հետ առնչվող ընկերություններից ոչ մեկը մրցույթում չի շահել։ Ինչ վերաբերում է պարզեցված գնումներին, ապա «Լելո» կուսակցությանն առնչվող երեք ընկերություններ՝ «Վազիսուբանի Մամուլս» ՍՊԸ-ն, «Չոկոսվի» ՍՊԸ-ն և «Էկոլար» ՍՊԸ-ն ստացել են վեց պայմանագիր՝ 14 980 լարի ընդհանուր արժողությամբ։

«Վրացական երազանքի» դոնորների հետ առնչվող 26 ընկերություններ 2017-2021 թվականներին գյուղատնտեսական պետական ​​ծրագրերի շրջանակներում ստացել են ավելի քան 22 միլիոն լարիի ֆինանսավորում, իսկ 2021-2022 թվականներին խաղողի սուբսիդավորման ծրագրի շրջանակներում հինգ ընկերություններ՝ մինչև 18 միլիոն լարի:

2017-2021 թվականներին Զուրաբ Չխաիձեի հետ կապված ալկոհոլ արտադրող «Կախուրի ավանդական գինեգործություն» ընկերությունը արտոնյալ ագրովարկով ստացել է ավելի քան 6 միլիոն լարի, իսկ խաղողի բերքահավաքի սուբսիդավորման շրջանակներում՝ մինչև 7 միլիոն լարի։ Չխաիձեն 2023 թվականին «Վրացական երազանքին» նվիրաբերել է 60 հազար լարի, իսկ ընդհանուր իշխող կուսակցությանը՝ 240 հազար լարի։

Իշխող կուսակցության շահառու դոնորներից բացահայտվել են «Ռիչ Մետալ Գրուպ» (RMG) հանքարդյունաբերական ընկերությունում աշխատող 19 անձ, որոնք հոկտեմբեր-նոյեմբեր ամիսներին «Վրացական երազանքին» նվիրաբերել են ընդհանուր առմամբ 524 հազար լարի։ Դոնորների թվում էին ընկերության գործադիր տնօրենը («Արեմջի գոլդ» ՍՊԸ-ի և «Արեմջի Կոպեր» ԲԲԸ-ի գործադիր տնօրեն Ջոնդո Շուբիթիձեն), ինչպես նաև RMG խմբում ընդգրկված ընկերությունների միջին և ցածր մակարդակի այլ աշխատակիցներ։

«Բացի խոշոր բիզնես խմբերի տնօրեններից ու գործընկերներից, հաճախ իշխող կուսակցության դոնորները ընկերություններում նման պաշտոններում զբաղված մարդիկ են՝ ֆինանսիստ, երկրաբան, մեխանիկ, արտադրամասի վարիչ և այլն։ Այս հանգամանքը կասկած է առաջացնում, որ նրանք ֆիկտիվ դոնորներ են, իսկ իրական դոնորը կոծկվում է, ինչը օրենքի խախտում է։

Նման գործելաոճը հայտնաբերվել է RMG խմբի, «Անագի» խմբի, «Ալյանս» և «Նեքսթ» խմբի կողմից աշխատող դոնորների հետ կապված։ Շինծու նվիրատվության կասկած են հարուցում նաև մի խմբի կողմից կարճ ժամանակահատվածում կատարված նվիրատվությունները, որոնք տեղի են ունեցել «Լիլո-մոլ» ՍՊԸ-ի առնչությամբ, երբ ընկերության մանր բաժնետերերը խոշոր գումարներ են նվիրաբերել իշխող կուսակցությունը նույն օրը»,- նշում է «Թրանսփարենսի Ինթերնեշնլ-Վրաստան»-ը։

2023 թվականի դեկտեմբերի օրենսդրական փոփոխություններով արգելվում էր կուսակցությանը նվիրատվություններ կատարել իրավաբանական անձանց կողմից։ Ըստ «Թրանսփարենսի Ինթերնեշնլ-Վրաստան»-ի՝ փոփոխությունը հիմնականում ձևական բնույթ ունեն և չեն վերացնի իշխող կուսակցության և այլ կուսակցությունների միջև առկա ֆինանսական մեծ անհավասարությունը։