Եթե ​​չենթարկվեն օրենքին, կլինեն տուգանքներ, արգելանք, և չեն կարողանա աշխատել. Կալաձե

Նրա խոսքով՝ ինքը չի ակնկալում, որ իրեն, կամ իր թիմակիցներին կարող են պատժամիջոցների ենթարկել։ «Մենք ոչինչ չենք արել, որ ենթարկվենք պատժամիջոցների։ Ինչպե՞ս կարելի է պատժամիջոցներ կիրառել այն մարդկանց նկատմամբ, որոնք իրենց երկրում օրենք են ընդունում, իսկ երկրի բնակչության մեծամասնությունը դրա իրավունքը տվել է, օրինակ, պատգամավորներին ու իշխանությանը, որն այսօր ներկայացված է կառավարության տեսքով։ Վստահ եմ, որ պատժամիջոցներ չեն լինի»,- ասել է Կալաձեն։

Վրաստանի խորհրդարանի նախագահ Շալվա Պապուաշվիլին այսօր ստորագրել է ռուսական օրենքը։ Օրենքն այսօր հրապարակվել է «Օրենսդրական տեղեկագրում»։

Օրենքի համաձայն՝ բոլոր այն հասարակական և լրատվական կազմակերպությունները, որոնք իրենց եկամուտների 20%-ից ավելին ստանում են միջազգային կազմակերպությունների դրամաշնորհներից, պետք է գրանցվեն որպես օտարերկրյա ուժի շահեր կրող կազմակերպություններ։ Նման կազմակերպությունները պարտավոր են օգոստոսին դիմել Հանրային ռեգիստրի գործակալություն և պահանջել գրանցվել որպես օտարերկրյա ուժի շահեր կրող կազմակերպություն։

Սահմանված ժամկետում գրանցումից խուսափելը կամ ֆինանսական հայտարարագիր չներկայացնելը կառաջացնի տուգանք՝ 25 000 լարիի չափով։ Արդարադատության նախարարության պահանջները չկատարելու համար օրենքը նախատեսում է լրացուցիչ տուգանքներ՝ 10 000 և 20 000 լարիի չափով։

Բացի այդ, Արդարադատության նախարարությունը իրավունք ունի տուգանել բոլոր անձանց (այդ թվում՝ ֆիզիկական անձանց) 5000 լարիով՝ պահանջվող տեղեկությունը չներկայացնելու համար։ Արդարադատության նախարարությունը կարող է ֆիզիկական անձանցից պահանջել նաև անձնական տվյալներ, կոմերցիոն, մասնագիտական ​​և գաղտնի տեղեկություն։

Հարյուրից ավելի հասարակական կազմակերպություններ և առցանց լրատվականներ հայտարարել են, որ չեն գրանցվելու «գործակալների» ռեգիստրում։ Որոշ կազմակերպություններ նախատեսում են վիճարկել ռուսական օրենքը Վրաստանի Սահմանադրական և Մարդու իրավունքների եվրոպական դատարաններում։