„თუ არ დაემორჩილებიან [„უცხოეთის აგენტების“ შესახებ რუსულ კანონს], არის ფინანსური ჯარიმები, შემდეგ მოხდება მათი ანგარიშების დაყადაღება და შემდეგ ისინი ვერ შეძლებენ უბრალოდ ფუნქციონირებას. ვერ შეძლებენ იმ თანხების მიღებას, რასაც იღებენ. თუ შენ კეთილ საქმეს აკეთებ და არ გაქვს ბოროტი ზრახვები, რა პრობლემაა დეკლარაციის შევსება და შენი ფინანსების ჩვენება - საიდან იღებ შემოსავლებს და რა კონკრეტული პროექტები ფინანსდება. თუმცა, არსებობს ეჭვი იმისა, რომ პოლარიზაცია, რევოლუციური სცენარის დაფინანსება, ყველაფერი ხდებოდა ამ გაუმჭვირვალობის გამო“, - განაცხადა „ქართული ოცნების“ გენერალურმა მდივანმა და თბილისის მერმა კახა კალაძემ.
ახალი ამბები
მკითხველის რჩეული
- 1 მოსამართლემ გორში დაკავებული აქტივისტის საქმეზე ყველა საგამოძიებო მოქმედება უკანონოდ ცნო
- 2 „ქართული ოცნების“ დეპუტატი აღიარებს, რომ სიძულვილისა და ძალადობის კამპანიის ორგანიზატორია
- 3 რუსეთმა უკრაინაში მებრძოლ რუსუდან ივანეიშვილს პატიმრობა დაუსწრებლად მიუსაჯა
- 4 გვჭირდება კონკრეტული ნაბიჯები, რომლებიც შეაჩერებს საქართველოს ხელისუფლებას - ვანო ჩხიკვაძე
- 5 მასობრივად წაშალეს „მთის ამბების“ კრიტიკული მასალები ფეისბუკიდან
- 6 7 წლის წინ სიღნაღის პოლიციაში მოქალაქის ცემისთვის ყოფილ პოლიციელს ბრალი წარუდგინეს
მისივე თქმით, არც პირადი და არც თანაგუნდელების დასანქცირების მოლოდინი არ აქვს. „არაფერი გაგვიკეთებია ისეთი, რომ სანქციების ქვეშ მოვექცეთ. როგორ შეიძლება, სანქციები დაუწესო ადამიანებს, რომლებიც საკუთარ ქვეყანაში კანონს იღებენ და ამის უფლება, ქვეყნის მოსახლეობის უმრავლესობამ მიანიჭა, მაგალითად, დეპუტატებს და ხელისუფლებას, რომელიც დღეს მთავრობის სახითაა წარმოდგენილი. დარწმუნებული ვარ, რომ არანაირი სანქციები არ იქნება“, - თქვა კალაძემ.
საქართველოს პარლამენტის თავმჯდომარე შალვა პაპუაშვილმა რუსულ კანონს ხელი დღეს მოაწერა. კანონი დღესვე გამოქვეყნდა „საკანონმდებლო მაცნეში“.
კანონის თანახმად, უცხოური ძალის ინტერესების გამტარებელ ორგანიზაციად დარეგისტრირება მოუწევს ყველა იმ არასამთავრობო და მედია ორგანიზაციას, რომელთა შემოსავლის 20%-ზე მეტი საერთაშორისო ორგანიზაციებიდან მიღებული გრანტია. ასეთი ორგანიზაციები ვალდებულები არიან აგვისტოში განცხადებით მიმართონ საჯარო რეესტრის სააგენტოს და უცხოური ძალის ინტერესების გამტარებელ ორგანიზაციად რეგისტრაცია მოითხოვონ.
რეგისტრაციისთვის თავის არიდება ან საფინანსო დეკლარაციის დადგენილ ვადაში წარუდგენლობა გამოიწვევს დაჯარიმებას 25 000 ლარის ოდენობით. კანონი იუსტიციის სმაინისტროს მოთხოვნების შეუსრულებლობისთვის დამატებით ითვალისწინებს 10 000 და 20 000 ლარის ოდენობით ჯარიმებს.
ამასთან, იუსტიციის სამინისტროს უფლება აქვს, ყველა პირი (მათ შორის, ფიზიკურიც) 5000 ლარით დააჯარიმოს მოთხოვნილი ინფორმაციის წარუდგენლობისთვის. იუსტიციის სამინისტროს ფიზიკური პირებისგან შეუძლია გამოითხოვოს პერსონალური მონაცემები, კომერციული, პროფესიული და საიდუმლოების შემცველი ინფორმაციაც.
ასზე მეტმა საზოგადოებრივმა ორგანიზაციამ და ონლაინგამოცემებმა განაცხადეს, რომ ისინი „აგენტების“ რეესტრში არ დარეგისტრირდებიან. ორგანიზაციების ნაწილი რუსული კანონის გასაჩივრებას გეგმავს საქართველოს საკონსტიტუციო და ადამიანის უფლებათა ევროპულ სასამართლოებში.
