Եթե ​​չլիներ Եվրամիության հետ առանց վիզայի ռեժիմը, ավելի քիչ քաղաքացիներ կլքեին Վրաստանը. Կոբախիձե

Կոբախիձեի խոսքով, երբ տնտեսապես ուժեղ երկիրը հեշտացնում է վիզային ռեժիմը տնտեսապես ավելի թույլ երկրի բնակչության համար, բնական է, որ դա նպաստում է բնակչության արտահոսքին։

«Օրինակ՝ Եվրամիությանն անդամակցելուց և առանց վիզայի ռեժիմի գործարկումից հետո Լիտվայում բնակչությունը նվազել է 600 հազարով՝ 3,4 միլիոնից դառնալով 2,8 միլիոն, իսկ Լատվիայում՝ 400 հազարով՝ 2,3 միլիոնից հասնելով 1,9 միլիոնի։ Միաժամանակ, երկիրը լքած լիտվացիների և լատվիացիների ճնշող մեծամասնությունը երիտասարդներ էին։

Այս ֆոնին Վրաստանն ունի ամենաօպտիմալ տվյալները։ Մասնավորապես, Եվրամիության հետ առանց վիզայի ռեժիմի գործարկումից հետո 2018-21 թվականներին միգրացիոն բացասական սալդոն կազմել է ընդամենը 29 հազար, այսինքն՝ 4 տարում երկրից ընդամենը 29 հազարով ավելի մարդ է դուրս եկել, քան մուտք գործել (համեմատության համար նշենք, որ նախորդ իշխանությունների օրոք՝ 2004-12 թթ, երբ Վրաստանի քաղաքացիները չէին կարողանում օգտվել Եվրամիությունում առանց վիզայի ռեժիմից, միգրացիոն բացասական սալդոն կազմել է 221 հազար)։

«Եթե չլիներ Եվրամիության հետ առանց վիզայի ռեժիմը, ապա վստահաբար կարելի է ասել, որ 2018-21 թվականներին Վրաստանը ոչ թե բացասական, այլ դրական միգրացիոն սալդո կունենար»,- գրել է Կոբախիձեն սոցցանցում։

Ֆեյսբուքում հրապարակված գրառման մեջ «Վրացական երազանքի» նախագահը նաև Ամերիկայի Միացյալ Նահանգների վիզային քաղաքականության մասին գրում է.

«ԱՄՆ-ը շատ խիստ վիզային քաղաքականություն է վարում Վրաստանի քաղաքացիների համար։ Օրինակ՝ 2021 թվականին ԱՄՆ-ը հաստատել է Ռուսաստանի քաղաքացիների վիզայի դիմումների 71%-ը, իսկ Վրաստանի քաղաքացիների վիզայի դիմումների միայն 37%-ը։

Իհարկե, այս հանգամանքը լուրջ անհարմարություններ է պատճառում Վրաստանի քաղաքացիներին, ի թիվս այլոց, որոշ մարդկանց ստիպում է ռիսկի դիմել և Մեքսիկայով տեղափոխվել ԱՄՆ։ Սակայն, մյուս կողմից, խիստ վիզային քաղաքականությունը զգալիորեն խոչընդոտում է Վրաստանից ԱՄՆ վրացիների ներգաղթին, ինչն էլ իր դրական ազդեցությունն է ունենում։ Բնականաբար, միգրացիայի սալդոն կվատթարանա ԱՄՆ-ի կողմից վիզային ռեժիմի մեղմացման պայմաններում։

Եզրափակելով՝ կարելի է ասել, որ Վրաստանի ժողովրդագրական իրավիճակն ու միտումները լուրջ ուշադրություն են պահանջում։ Սակայն այս թեմայի շուրջ գերակշռում են ենթադրական ու ուռճացված հայտարարությունները, ինչը պահանջում է պատշաճ արձագանք։

Նրանք, ովքեր իսկապես մտածում են երկրի ժողովրդագրական միտումների բարելավման մասին, պետք է զբաղվեն ոչ թե շահարկումներով, այլ համապատասխան գործնական առաջարկներ ներկայացնելով»,- գրել է Կոբախիձեն։

Ներքին գործերի նախարարության կողմից հրապարակված՝ Վրաստանի պետական ​​սահմանը հատելու վիճակագրության համաձայն, 2022 թվականին երկրից դուրս է եկել 2 422 849 քաղաքացի, մուտք է գործել 2 378 263 (տարբերությունը՝ 44 586):

Եվրամիության ապաստանի գործակալության (EUAA) տվյալների համաձայն՝ 2022 թվականի առաջին 11 ամիսներին ԵՄ երկրները Վրաստանի քաղաքացիներից ստացել են ապաստանի 26 177 դիմում։ Վրաստանի քաղաքացիներն ամենից հաճախ ապաստան են հայցում Ֆրանսիայում, Գերմանիայում, Իտալիայում և Իռլանդիայում։ Միայն նոյեմբերին ապաստան է խնդրել Վրաստանի 3 030 քաղաքացի, ինչը, ըստ գործակալության, ամենաբարձր թիվն է 2008 թվականից ի վեր։ Անցյալ տարի Եվրամիությունում ապաստան հայցող Վրաստանի քաղաքացիների մոտավորապես 92%-ն առաջին անգամ է լրացրել դիմումը։

2017 թվականի մարտի 28-ից Վրաստանի քաղաքացիների համար ԵՄ/Շենգենյան գոտու անդամ երկրներում գործում է առանց վիզայի ռեժիմ։

Առանց վիզայի ճանապարհորդել հնարավոր է Շենգենյան գոտու տարածքում, որն ընդգրկում է ԵՄ անդամ 22 և ոչ անդամ 4 երկիր։ Առանց վիզայի ճանապարհորդություն հնարավոր է նաև Շենգենյան գոտու 4 թեկնածու երկրներում: ԵՄ/Շենգենյան գոտու երկրներ մեկնելու համար անձը պետք է ունենա Վրաստանի քաղաքացու կենսաչափական անձնագիր, որի վավերականության ժամկետը առնվազն 3 ամսով ավելի է ԵՄ/Շենգենյան գոտու երկիրը լքելու օրվանից։