Միացյալ Նահանգների Սենատի երկկուսակցական խումբը նամակ է հղել Վրաստանի վարչապետ Իրակլի Կոբախիձեին, որում սենատորները գրում են, որ եթե այսպես կոչված օտարերկրյա գործակալների մասին ռուսական օրենքն ընդունվի, նրանք ստիպված կլինեն խրախուսել Վրաստանի նկատմամբ ամերիկյան քաղաքականության փոփոխությունը։ «Ամերիկայի ձայնը», որը ձեռք է բերել նամակը, գրում է, որ սենատորները կքննարկեն քաղաքականության փոփոխության մի քանի գործոն, ներառյալ անհատական պատժամիջոցների սահմանումը, ուղղակի ֆինանսավորման դադարեցումը և վիզային սահմանափակումների ընդլայնումը:
Լրահոս
Ընթերցողի ընտրանի
- 1 Գուդաուրիի հնդկական ռեստորաններից մեկում հայտնաբերվել է 12 մարդու դի
- 2 Կոբախիձեի խոսքով՝ պետական ծառայողները և ուսուցիչները ընթերցանության ընկալման խնդիր ունեն
- 3 Խորհրդարանն այլևս գոյություն չունի, քանի որ մի կուսակցություն տապալեց սահմանադրությունը. Զուրաբիշվիլի
- 4 Եվրախորհրդարանը պահանջում է պատժամիջոցների ենթարկել «Երազանքի» առաջնորդներին և նոր ընտրություններ անցկացնել Վրաստանում
- 5 Նախագահի թեկնածու Միխեիլ Կավելաշվիլին բարձրագույն կրթություն չունի
- 6 Ցույցերի ժամանակ Թբիլիսիում է գտնվել Ռուսաստանի ոստիկանական արհմիությունների ասոցիացիայի ղեկավարը
14 սենատորները վարչապետ Կոբախիձեին գրում են, որ ռուսական օրենքը «զրպարտում է Վրաստանի ամենամոտ գործընկերներին՝ ԱՄՆ-ին և Եվրամիությանը, որպես վնասակար դերակատարներ։ Նման փոփոխությունը հանգեցնում է Վրաստանի նկատմամբ Ամերիկայի քաղաքականության փոփոխության և արտացոլում է Վրաստանի քաղաքականության նոր վիճակը։
Ինչպես Եվրամիության բարձրաստիճան շատ պաշտոնյաներ, այնպես էլ սենատորներն ասում են, որ «Վրացական երազանքի» նախաձեռնած օրինագծի թիրախը քաղաքացիական հասարակությունն ու անկախ լրատվամիջոցներն են, որոնք «վրացական ժողովրդավարության կենսական զարկերակն են»։ Բացի այդ, օրենքի նախագիծն ուղղված է ԱՄՆ-ի և Եվրոպայի աջակցության դեմ, Վրաստանի այն գործընկերների դեմ, որոնք 1991 թվականից ի վեր հարյուրավոր միլիոն դոլարներ են ներդրել Վրաստանի ինքնիշխանության և ժողովրդավարական վերափոխումների համար։
«Մենք՝ որպես Կոնգրեսի անդամներ, որոնք խոր հարգանքով են վերաբերվում վրաց ժողովրդին և միշտ եղել ենք ամուր երկկուսակցական և ձեր երկրի հետ երկկողմ կապերի ամենաառաջնային ջատագովները, շատ հիասթափված կլինենք, եթե Վրաստանի խորհրդարանն ընդունի օտարերկրյա գործակալների մասին օրենքը, որը խաթարում է Միացյալ Նահանգների հետ Վրաստանի հարաբերությունները։
Եթե այս օրինագիծն ընդունվի, մենք ստիպված կլինենք խրախուսել Վրաստանի նկատմամբ ԱՄՆ քաղաքականության փոփոխությունները, որոնք կարող են ներառել պատժամիջոցներ Վրաստանի դեմոկրատական զարգացմանը խոչընդոտող կամ նրա եվրատլանտյան զարգացման հետագիծը սահմանափակող անձանց դեմ, վերանայել ԱՄՆ-ի ուղղակի ֆինանսական օգնությունը և ընդլայնել ԱՄՆ մուտքի արտոնագրերի արգելքները»,- ասում են սենատորները։
Սենատորները ժխտում են «Վրացական երազանքի» նարատիվն այն մասին, որ թափանցիկության օրենքը նման է ԱՄՆ օտարերկրյա գործակալների ազդեցության ակտին՝ FARA-ին.
«Մենք պետք է նաև փաստենք, որ օտարերկրյա գործակալների մասին օրենքը չի արտացոլում ԱՄՆ-ի որևէ օրենք և կօգտագործվի քաղաքացիական հասարակությանն ու լրատվամիջոցներին լռեցնելու համար, որոնք կարևոր դեր են խաղում Վրաստանի ժողովրդավարական ինստիտուտների զարգացման գործում: Ինչպես գիտեք, խոսքի ազատությունը կարող է անհարմար լինել ցանկացած իշխող կուսակցության համար, սակայն չհամաձայնելու և հրապարակավ կարծիք հայտնելու կարողությունն այն է, ինչ ամրապնդում և ամրացնում է ժողովրդավարությունը»:
Նամակի վերջում սենատորները խոստանում են, որ երբեք չեն հրաժարվի «վրաց ժողովրդի ձգտումից, որն իր ձայնը բարձր և հստակ արտահայտեց՝ ի պաշտպանություն ժողովրդավարական և եվրոպական ապագայի, որը լսելի է բոլորին»։ Նրանց խոսքով՝ ԱՄՆ-ի և Վրաստանի հարաբերությունները հիմնված են փոխադարձ շահերի և ընդհանուր արժեքների վրա, և նրանցից յուրաքանչյուրը այդ հարաբերությունների հետագա խորացման ուժեղ կողմնակիցն է։ Սակայն ասում են նաև, որ հարաբերությունները չեն կարող «շարունակվել այնքան ժամանակ, քանի դեռ այս օրենսդրությունը ետ չի կանչվել»։
Նամակում սենատորները գրում են, որ Վրաստանի կառավարությունը պետք է հաշվի առնի՝ երկիրը դեպի Եվրամիության անդամակցություն տանելու իր քաղաքացիների մեծամասնության ցանկությունը, քանի որ այս օրենքի ընդունումը, ինչպես բազմիցս հայտարարել է Եվրամիությունը, բացասական ազդեցություն կունենա Վրաստանի՝ եվրոպական բլոկին միանալու հեռանկարների վրա, և դա կլինի կառավարության կողմից սեփական սահմանադրության անտեսումը։
Սենատորները նաև տեղյակ են Վրաստանի առջև ծառացած ռուսական սպառնալիքների մասին և ասում են, որ Միացյալ Նահանգները, ինչպես անցյալում, այնպես էլ ապագայում, կաջակցի վրաց ժողովրդի իրավունքին՝ պաշտպանելու Վրաստանի ինքնիշխանությունը, տարածքային ամբողջականությունը և Ռուսաստանից անկախությունը, որը Վրաստանում հիբրիդային պատերազմ է վարում և ընտրություններից առաջ լայնածավալ վնասակար ազդեցություն ունի հասարակության վրա։
«Ամերիկայի ձայնի» փոխանցմամբ՝ երկկուսակցական նամակի ուղարկումը ղեկավարել են Եվրոպայի անվտանգության և համագործակցության ենթահանձնաժողովի նախագահ սենատոր Ջին Շահինը և Սենատի արտաքին հարաբերությունների հանձնաժողովի ամենաբարձրաստիճան հանրապետական անդամ սենատոր Ջեյմս Ռիշին։ Նրանցից բացի նամակը ստորագրել են հետևյալ սենատորները՝ Բեն Քարդինը, Լինդսի Գրեհեմը, Քրիս Քունսը, Փիթ Ռիկեթսը, Ռիչարդ Դուրբինը, Ռոջեր Ուիկերը, Ռիչարդ Բլումենտալը, Թոմ Թիլիսը, Թիմ Քեյնը, Դեն Սալիվանը, Շելդոն Ուայթհաուսը և Մարտին Հայնրիխը։
