Եթե ​​Ուկրաինան պարտվի այս պատերազմում, Ռուսաստանն այնտեղ կանգ չի առնի․ Մակրոն

«Ի՞նչ եք կարծում, լեհերը, լիտվացիները, էստոնացիները, ռումինացիներն ու բուլղարացիները կկարողանա՞ն մի վայրկյան անգամ հանգստություն պահպանել, եթե Ռուսաստանը հաղթի Ուկրաինայում։ Եթե ​​Ռուսաստանը հաղթի այս պատերազմում, ապա Եվրոպայի նկատմամբ վստահությունը կհավասարվի զրոյի»,- ասել է Մակրոնը ֆրանսիական հեռուստաալիքին տված հարցազրույցում։

Հարցազրույցին հաջորդած հայտարարության մեջ Ֆրանսիայի նախագահը նշել է, որ պատերազմում հաղթանակի դեպքում Ռուսաստանը չի հրաժարվի իր տարածքային հավակնություններից, ինչը վտանգ է ներկայացնում հարևան երկրների համար։

«Ռուսաստանը դարձել է տերություն, որը ցանկանում է ընդլայնվել, և պարզ է, որ այստեղ կանգ չի առնելու։ Եթե ​​մենք հրաժարվենք Ուկրաինայից, եթե թույլ տանք, որ Ուկրաինան պարտություն կրի այս պատերազմում, ապա Ռուսաստանն անպայման կսպառնա Մոլդովային, Ռումինիային, Լեհաստանին»,- Ֆրանսիայի նախագահի խոսքերն է մեջբերում The Telegraph-ը։

Փետրվարի վերջին Փարիզում Ուկրաինայի աջակցության թեմայով համաժողովի ժամանակ Էմանուել Մակրոնը չի բացառել Ուկրաինայում արևմտյան զորքերի տեղակայման հնարավորությունը։ Մակրոնի հայտարարությունը քննադատության է ենթարկվել ֆրանսիական ընդդիմության առաջնորդների կողմից և այն անվանել են «թշնամական»։ Reuters-ը գրում է, որ շաբաթվա սկզբին Մարի Լը Պենի ծայրահեղ աջ կուսակցությունը, որը Մակրոնի հիմնական հակառակորդն է, ձեռնպահ է մնացել խորհրդարանում Ուկրաինայի հետ Ֆրանսիայի ստորագրած անվտանգության համաձայնագրին սատարելուց, իսկ ծայրահեղ ձախ կուսակցությունը դեմ է քվեարկել դրան։ Էմանուել Մակրոնն ասում է, որ համաձայն չէ ընդդիմության հետ։

«Այսօր Ուկրաինային աջակցելուց ձեռնպահ մնալու կամ դրան դեմ քվեարկելու որոշումը չի նշանակում ընտրել խաղաղություն։ Սա պարտության ընտրություն է: Այլ բան է... եթե պատերազմը տարածվի Եվրոպայում, մեղավորը Ռուսաստանն է լինելու, բայց եթե մենք որոշենք թույլ լինել, եթե այսօր որոշենք չպատասխանել, դա կլինի պարտության ընտրություն, իսկ ես չեմ ուզում դա»,- ասել է Մակրոնը երեկվա հարցազրույցում։

Ֆրանսիայի նախագահի խոսքով՝ Եվրոպայի համար կարևոր է կարմիր գծեր չգծել, ինչը Ռուսաստանի համար թուլության նշան կլինի և կխրախուսի Ուկրաինայում նրա գործողությունները։ Մակրոնը հրաժարվել է մանրամասնել, թե ինչպիսին կարող է լինել Ուկրաինայում զորքերի տեղակայումը։

«Ես չեմ ուզում դա անել։ Ես ցանկանում եմ, որ Ռուսաստանը դադարեցնի այս պատերազմը և հետ քաշվի իր դիրքերից, խաղաղության հասնելու հնարավորություն տա»,- ասել է Մակրոնը։

Ֆրանսիայի նախագահի խոսքով՝ Ուկրաինան մարտադաշտում հայտնվել է բարդ իրավիճակում, և դաշնակիցների կողմից ավելի ուժեղ աջակցություն է անհրաժեշտ։