Լրահոս

Փետրվարի 15-ին ընդունված բանաձևում Եվրախորհրդարանը լուրջ մտահոգություն է հայտնում Սաակաշվիլիի առողջության վատթարացման կապակցությամբ։

«Նախկին նախագահի վիճակի շարունակական ձախողումը սպառնում է Վրաստանի ԵՄ թեկնածության հեռանկարին»,- բանաձևում եվրոպացի խորհրդարանականները խոսում են Միխեիլ Սաակաշվիլիի քաշի կտրուկ կորստի մասին ստացված հաղորդագրությունների և արտահայտված ենթադրությունների մասին, որ նա կարող էր թունավորվել ծանր մետաղներով բանտում գտնվելու ժամանակ։ Նրանք Վրաստանի իշխանություններին կոչ են անում ազատ արձակել Սաակաշվիլիին, որպեսզի վերջինս արտերկրում պատշաճ բուժօգնություն ստանա։

Բանաձևն ընդգծում է օլիգարխ Բիձինա Իվանիշվիլիի հիմնարար դերը Միխեիլ Սաակաշվիլիի շարունակվող բանտարկության մեջ՝ «որպես անձնական վենդետայի մի մաս»: Ուստի խորհրդարանը վերահաստատում է իր կոչը Եվրոպայի խորհրդին և ժողովրդավարական գործընկերներին՝ քննարկելու Իվանիշվիլիի նկատմամբ պատժամիջոցներ սահմանելու հարցը՝ «Վրաստանում քաղաքական գործընթացի վատթարացման մեջ» նրա դերի համար։

Եվրախորհրդարանը կոչ է անում Վրաստանի նախագահ Սալոմե Զուրաբիշվիլիին օգտվել սահմանադրական իրավունքից և ներում շնորհել Սաակաշվիլիին, ինչը կվերացնի երկրում քաղաքական բևեռացումը. «Այն, թե ինչպես են վերաբերվում բանտարկյալ նախկին նախագահին, լակմուսի թուղթ է Վրաստանի կառավարության հավատարմության համար եվրոպական արժեքներին և նրա հռչակած եվրոպական նկրտումներին, ներառյալ ԵՄ թեկնածուի կարգավիճակը: Վրաստանը պետք է կենտրոնանա եվրոպական բարեփոխումների հաջողության վրա, և այդ հարցը պետք է վերադառնա քաղաքական դաշտի կենտրոն»,- ասված է բանաձևում։

«Վրացական երազանք» կուսակցության նախագահ Իրակլի Կոբախիձեի կարծիքով՝ նման բանաձևերի ընդունման նպատակը Վրաստանում խառնաշփոթ մտցնելն է։

«Չգիտեմ, թե ինչ է կատարվում Եվրախորհրդարանի հետ։ Մենք հնարավորինս զգույշ ենք եղել Եվրամիության ինստիտուտների նկատմամբ, և դրա համար էլ կենտրոնացել ենք կոնկրետ օդիոզ պատգամավորների վրա, բայց այս դեպքում սա համակարգային խնդիր է, որն այս ինստիտուտը՝ Եվրախորհրդարանն ունի։

Նման որոշմանը կնախանձեր նույնիսկ Խորհրդային Միության Գերագույն խորհուրդը։ Շատ լավ եմ հիշում 80-ականների վերջը: Այն ժամանակ հեռարձակվում էին Խորհրդային Միության Գերագույն խորհրդի նիստերը։ Այն, ինչ տեղի էր ունենում այնտեղ, նույնը եղավ այսօր, նույնը եղավ Եվրախորհրդարանի նախորդ երկու բանաձևերի դեպքում։ Ես ուղղակիորեն կասեմ, որ սա աղետ է»,- ասել է Կոբախիձեն։

«Վրացական երազանքի» նախագահը բացառում է Միխեիլ Սաակաշվիլիին ազատ արձակումը և կարծում է, որ Եվրահանձնաժողովը և Եվրոպական միության խորհուրդը չեն կիսի բանաձևի արձանագրությունները։

Բանաձևի վերջնական տեքստին չեն աջակցել 33 պատգամավորներ, իսկ 26-ը ձեռնպահ է մնաց։ Խորհրդարանի 362 պատգամավոր կողմ է քվեարկել Իվանիշվիլիի նկատմամբ պատժամիջոցներ կիրառելու վերաբերյալ արձանագրությանը, որը բանաձևին ավելացվել է Եվրոպական ժողովրդական կուսակցության նախաձեռնությամբ։