Լրահոս

«ԵՄ-ն կատարում է ապաստանի և միգրացիոն համակարգի բարելավման իր խոստումը։ ԵՄ քաղաքացիները ցանկանում են, որ իրենց կառավարությունները հաղթահարեն միգրացիայի մարտահրավերները, և այսօր մեծ քայլ է արվում այդ ուղղությամբ: Այս բարեփոխումը խնդրի էական մասն է, սակայն ԵՄ-ն հավատարիմ է իր վճռականությանը` լուծելու միգրացիայի հիմնական պատճառները՝ աշխատելով ծագման և տարանցման երկրների հետ և պայքարելով միգրանտների մաքսանենգության դեմ»,- ասել է Իսպանիայի ՆԳ նախարար Ֆերնանդո Գրանդե Մարլասկա Գոմեսը:

Երեք տարվա քննարկումներից հետո համաձայնեցված հինգ օրենքները ներառում են ապաստանի և միգրացիայի կառավարման բոլոր փուլերը: Բարեփոխումը ներառում է սահմանային հսկողության խստացում, սահմաններին կալանավայրերի ստեղծում, ապաստանի դիմումի քննարկման ընթացակարգի արագացում, Եվրամիության տարածք անօրինական մուտք գործած անձանց արդյունավետ արտաքսում և միգրանտների ավելի արդար բաշխում ԵՄ անդամ երկրների միջև։

Եվրոպական խորհրդի տարածած մամուլի հաղորդագրության համաձայն՝ նոր կանոնակարգերի ընդունումից հետո ապաստանի եվրոպական համակարգը կդառնա ավելի արդյունավետ, կբարձրանա անդամ երկրների միջև համերաշխությունը, ինչը հնարավորություն կտա թեթևացնել այն երկրների բեռը, որտեղ մեծ թվով միգրանտներ են մտնում։ Խոսքը ապաստան հայցողների մի մասին ԵՄ մի երկրից մյուսը տեղափոխելու մասին, և այն երկրները, որոնք հրաժարվում են ընդունել նրանց, ֆինանսական կամ նյութական օգնություն կտրամադրեն նրանց, ովքեր ընդունում են:

ԵՄ սահմանային Frontex գործակալությունը այս տարի մինչև նոյեմբերն արձանագրել է ավելի քան 355 000 անօրինական սահմանահատումներ, ինչը ամենաբարձր ցուցանիշն է 2016 թվականից ի վեր:

Այնպիսի երկրներ, ինչպիսիք են Իտալիան և Գերմանիան, ողջունել են բարեփոխումների վերաբերյալ համաձայնագիրը: Գերմանիայի կանցլեր Օլաֆ Շոլցն ասել է, որ բարեփոխումը կթեթևացնի հատկապես տուժած բոլոր երկրների բեռը, այդ թվում՝ Գերմանիայի։

Հունգարիան դեմ է արտահայտվել ձեռք բերված համաձայնությանը. «Մենք ոչ ոքի թույլ չենք տա ներս մտնել մեր կամքին հակառակ, ոչ ոք Բրյուսելից կամ որևէ այլ տեղ չի կարող մեզ ասել, թե ում կարող ենք ներս թողնել, և մենք դիմադրում ենք այս դիրքորոշման համար պատժվելուն», - ասել է արտգործնախարար Պիտեր Սիիարտոն:

Բարեփոխումը քննադատության է ենթարկվել միգրանտների հետ աշխատող ազդեցիկ կազմակերպությունների կողմից, այդ թվում՝ Amnesty International-ի, Oxfam-ի, Caritas-ի և Save the Children-ի:

«Իրականում այսօր ձեռք բերված պայմանավորվածությունը պատմականորեն վատն է։ Ակնհայտ է, որ օրենսդիրների մեծամասնության համար առաջնահերթ խնդիրն էր փակել սահմանները, այլ ոչ թե պաշտպանել մարդկանց, ներառյալ ընտանիքներին և երեխաներին, ովքեր փախչում են բռնությունից, հակամարտություններից, սովից և մահից և փնտրում են պաշտպանություն Եվրոպայում», - ասվում է Save the Children-ի հայտարարության մեջ:

Ըստ Amnesty International-ի՝ այսօրվա համաձայնագիրը գործնականում նշանակում է, որ ավելի շատ մարդիկ կկալանավորվեն Եվրամիության սահմաններին։

Բարեփոխման մասով տեխնիկական հարցերի շուրջ քննարկումները կշարունակվեն մինչև 2024 թվականի փետրվար։ Ակնկալվում է, որ այն կհաստատվի հունիսի վերջին։