Եվրոպական խորհուրդը Վրաստանին թեկնածուի կարգավիճակ է շնորհել

Բացի այդ, Եվրոպական խորհուրդը որոշել է սկսել Ուկրաինայի և Մոլդովայի հետ անդամակցության բանակցությունները։

Ինչպես գրում է Շառլ Միշելը, ԵՄ-ն բանակցություններ կսկսի Բոսնիա-Հերցեգովինայի հետ, երբ ձեռք բերվի անդամակցության չափանիշներին համապատասխանության անհրաժեշտ աստիճանը, և Հանձնաժողովին հրավիրել է համապատասխան զեկույց պատրաստել նման որոշման համար։

«Սա հույսի հստակ ուղերձ է նրանց ժողովուրդների և մեր աշխարհամասի համար», - նշում է Շառլ Միշելը:

Այսօրվա որոշմամբ Եվրոպական խորհուրդը կիսեց նոյեմբերի 8-ին Եվրահանձնաժողովի կողմից ստացված հանձնարարականը։ Եվրահանձնաժողովի հանձնարարականն էր Վրաստանին կարգավիճակ շնորհել այն վերապահումով, որ կառավարությունը քայլեր կձեռնարկի 9 ուղղություններով։ Միևնույն ժամանակ Եվրահանձնաժողովը առաջարկել էր սկսել Ուկրաինայի և Մոլդովայի հետ անդամակցության բանակցությունները։

Վրաստանը, Ուկրաինան և Մոլդովան ԵՄ անդամակցության հայտ են ներկայացրել 2022 թվականի մարտին։ Անցյալ տարի Եվրամիությունը Ուկրաինային և Մոլդովային շնորհեց ԵՄ անդամակցության թեկնածուի կարգավիճակ, իսկ Վրաստանին՝ եվրոպական հեռանկար և առաջ քաշեց 12 կետից բաղկացած նախապայմաններ՝ թեկնածուի կարգավիճակ ստանալու համար։ Վրաստանի դիմումի վերաբերյալ հանձնաժողովի պատրաստած եզրակացության մեջ առաջնահերթություններից էին քաղաքական բևեռացման դադարեցումը, դատական ​​բարեփոխումների իրականացումը, ապաօլիգարխացումը, կազմակերպված հանցավորության դեմ պայքարի ուժեղացումը, լրատվամիջոցների ազատության ապահովումը և այլն։