Վրաստանին որոշ պայմաններով պետք է տրվի թեկնածու երկրի կարգավիճակ․ Եվրահանձնաժողով

«Հանձնաժողովը խորհուրդ է տալիս Վրաստանին թեկնածուի կարգավիճակ տալ այն պայմանով, որ կառավարությունը էական քայլեր կձեռնարկի բարեփոխումների իրականացման առումով։ Սա իսկապես տոնական օր է Վրաստանի համար։ Հաճախ, երբ մենք կարգավիճակ ենք տալիս, կամ խորհուրդ, ասում ենք, որ դեռ մի քանի քայլ կա անելու: Սա մանրամասն ներկայացված է հանձնարարականում: Սա իսկապես հսկայական քայլ է Վրաստանի համար և ընդգծում է Վրաստանի բնակչության մեծամասնության տպավորիչ և շատ հստակ դիրքորոշումը Եվրոպական միությանն անդամակցելու վերաբերյալ»,- ասել է Եվրահանձնաժողովի նախագահը։

Վրաստանին ԵՄ անդամության թեկնածուի կարգավիճակ տալու վերաբերյալ վերջնական որոշումը պետք է կայացվի դեկտեմբերի 14-15-ին կայանալիք գագաթնաժողովում։

«Սրտանց շնորհավորում եմ բոլոր քաղաքական առաջնորդներին, իշխանությանը, ընդդիմությանը, խորհրդարանին, նախագահին, քաղաքացիական հասարակությանը, ձեզ, լրատվամիջոցներին, բայց,

առաջին հերթին ի սրտե շնորհավորում եմ Վրաստանի բնակչությանը, այն մարդկանց, ովքեր հաստատակամորեն և հետևողականորեն աջակցում են Վրաստանի եվրոպական ուղուն։

Սա Վրաստանի բնակչության եվրոպական ապագայի նկատմամբ Եվրոպական միության ամուր աջակցության և վերջին տարիներին ձեռք բերված առաջընթացի մեծ ճանաչումն է»,- ասել է Վրաստանում ԵՄ դեսպան Պավել Հերչինսկին։

Վրաստանի նախագահը նույնպես արձագանքել է որոշմանը։

«Ուրախ եմ վրաց ժողովրդի հետ միասին և ողջունում եմ Եվրահանձնաժողովի դրական հանձնարարականը՝ Վրաստանին թեկնածուի կարգավիճակ տալու վերաբերյալ։ Որպես նախագահ՝ ես կշարունակեմ խաղալ իմ դերը՝ որպես եվրոպամետ առաջնորդ, ավելի քան երբևէ՝ խթանելու և շարունակելու այն բարեփոխումները, որոնք դեռևս անհրաժեշտ են»,- գրել է Սալոմե Զուրաբիշվիլին սոցցանցում։

Վրաստանը, Ուկրաինան և Մոլդովան ԵՄ անդամակցության հայտ են ներկայացրել 2022 թվականի մարտին։

Անցյալ տարի Եվրոպական միությունը Ուկրաինային և Մոլդովային շնորհեց ԵՄ անդամակցության թեկնածուի կարգավիճակ, իսկ Վրաստանին՝ եվրոպական հեռանկար և թեկնածուի կարգավիճակ ստանալու համար առաջ քաշեց 12 կետից բաղկացած նախապայմաններ։ Վրաստանի դիմումի վերաբերյալ հանձնաժողովի պատրաստած եզրակացության մեջ առաջնահերթություններից էին քաղաքական բևեռացման դադարեցումը, դատական ​​բարեփոխումների իրականացումը, ապաօլիգարխացումը, կազմակերպված հանցավորության դեմ պայքարի ուժեղացումը, լրատվամիջոցների ազատության ապահովումը և այլն։

Այսօր հայտնի դարձավ, որ Եվրահանձնաժողովն արդեն առաջարկել է Ուկրաինային և Մոլդովային սկսել Եվրոպական միությանն անդամակցելու բանակցությունները։