Լրահոս

Վարչապետի խոսքով՝ Խիդաշելին ոչ մի տեղեկության, հատկապես գաղտնի տեղեկության հասանելիություն չի ունեցել։

«Ինչ վերաբերում է մեր որոշմանը, ապա մենք պատասխանատու ենք մեր որոշումների համար։ Ի վերջո, մենք քննարկեցինք այս թեմայի շուրջ։ Որոշ աշխատանքային հարաբերություններ են եղել, որոնք ավարտվել են փետրվարից։

Այստեղ ասվեց, որ այդ անձը Եվտուշենկովի մտերիմն է, ով Բայդենների ընտանիքին մոտ կանգնած մարդ է, և ես կարծում եմ, որ այստեղ շահարկումների հիմքեր չկան։ Եվտուշենկովն անմիջականորեն մտերիմ է Բայդենների ընտանիքի հետ։ Ամերիկան ​​պատժամիջոցներ չի կրառել, քանի որ կան սերտ կապեր ամերիկյան քաղաքական էլիտայի, այդ թվում՝ Բայդենի ընտանիքի հետ: Ուստի, կարծում եմ, այստեղ շահարկումներն ավելորդ են։

Չգիտեմ՝ նա ռուսամետ էր, թե ոչ [Դավիթ Խիդաշելին], բայց նորից կրկնեմ՝ այս անձը կապ ունի Եվտուշենկովի հետ, ով ամերիկյան քաղաքական էլիտայի հետ առնչվող անձնավորություն է։ Պաշտպանության նախարարը չի տեսել նրա՝ նախարարության հետ աշխատանքը շարունակելու անհրաժեշտությունը»,- լրագրողներին ասել է Կոբախիձեն։

Ռուս օլիգարխի գործընկեր Դավիթ Խիդաշելին 2020 թվականից մինչև 2024 թվականի փետրվարի 9-ը աշխատել է որպես Վրաստանի պաշտպանության նախարարի խորհրդական։ 2022 թվականի ապրիլին Վրաստանի կառավարությունը նրա ընկերությանը Ռաճայում և Քվեմո Սվանեթիում 49 տարով 104 712 հեկտար անտառ է փոխանցել։ Նա 2007-2014 թվականներին եղել է Եվտուշենկովին պատկանող ռուսական «Սիստեմա» կորպորացիայի փոխնախագահը։

«Սիստեման» խոշոր կոնգլոմերատ է, որն աջակցում է Ղրիմի բռնակցմանը։ Այն ներառում է «Կրոնշադտ» ընկերությունը, որը 2021 թվականից արտադրում է ռազմական անօդաչու սարքեր և սպասարկում է Ռուսաստանի պաշտպանության նախարարությանը։ «Սիստեմայի» սեփականատերը միլիարդատեր գործարար, Պուտինի մերձավոր շրջապատի անդամ Վլադիմիր Եվտուշենկովն է։ Ուկրաինայում պատերազմի սկսվելուց հետո օլիգարխի նկատմամբ պատժամիջոցներ են կիրառվել Մեծ Բրիտանիայի, Ավստրալիայի, Ուկրաինայի և Նոր Զելանդիայի կողմից։ 2023 թվականի նոյեմբերին հայտնի դարձավ, որ «Սիստեման» պատժամիջոցների է ենթարկվել նաև Ամերիկայի Միացյալ Նահանգների կողմից։ Սակայն ինքը՝ Վլադիմիր Եվտուշենկովը, ԱՄՆ-ի կողմից պատժամիջոցների ենթարկված ռուս միլիարդատերերի թվում չէ։

The New York Post-ը մեկ ամիս առաջ հոդված էր հրապարակել, որում ասվում էր, որ Վլադիմիր Եվտուշենկովը դարձյալ խուսափել է այն ֆինանսական պատժամիջոցներից, որոնք ԱՄՆ նախագահ Ջո Բայդենի վարչակազմը սահմանել է ավելի քան 500 անհատների և ընկերությունների նկատմամբ՝ կապված ռուս այլախոհ և Կրեմլի քննադատ Ալեքսեյ Նավալնիի մահվան և Ուկրաինայում ընթացող պատերազմի հետ։ The New York Post-ը գրում է, որ Վլադիմիր Եվտուշենկովն հավանաբար կապեր ունի Ջո Բայդենի որդու՝ Հանթեր Բայդենի հետ, ում հետ օլիգարխը հանդիպել է 2012 թվականի մարտին՝ Նյու Յորքում, իսկ 2013 թվականի հունվարին՝ Վաշինգտոնում։