ԵԽԽՎ-ը Ռուսաստանը ճանաչել է որպես ահաբեկչական ռեժիմ

Հոյտեմբերի 13-ին միաձայն ընդունված բանաձևում ԵԽԽՎ անդամները հաստատել են իրենց լիակատար աջակցությունն Ուկրաինային։ Վեհաժողովը կոչ է անում ստեղծել «համապարփակ համակարգ»՝ Ռուսաստանի Դաշնությանը և նրա առաջնորդներին պատասխանատվության ենթարկելու Ուկրաինայում ագրեսիայի և այս համատեքստում մարդու իրավունքների և միջազգային մարդասիրական իրավունքի խախտման համար:

Վեհաժողովը Եվրախորհրդի անդամ երկրներին կոչ է անում արագացնել հատուկ միջազգային տրիբունալի ստեղծումը, Ռուսաստանի ռեժիմը ճանաչել որպես ահաբեկիչ և Ուկրաինային տրամադրել հակաօդային պաշտպանության անհրաժեշտ համակարգեր։

Բանաձևի քվեարկությունից առաջ Ուկրաինայի նախագահ Վլադիմիր Զելենսկին ելույթ է ունեցել Եվրախորհրդի խորհրդարանական վեհաժողովում՝ ասելով, որ միասնական Եվրոպան պատմության մեջ երբեք այնքան ուժեղ չի եղել, որքան հիմա։

«Եվրոպան շատ ավելի ուժեղ է, քան ինչ-որ մեկը կարծում էր։ Պոտենցիալ ազատությունը, օրենքի գերակայությունը, մարդու իրավունքները, սոցիալական արդարությունը պաշտպանելու մեր կարողությունն ավելի ուժեղ է, քան մենք կարծում ենք:

Եվրոպան կարող է պատմական դեր խաղալ Ուկրաինայի դեմ ռուսական ագրեսիայի հանցագործությունների համար հատուկ հանձնաժողովի ստեղծման գործում: Եկեք անենք սա: Սա կլինի միջազգային իրավունքի սկզբունքները պաշտպանելու լավագույն միջոցը։

Եվրոպան կարող է առաջատար դառնալ այս պատերազմի պատճառած վնասը փոխհատուցելու ջանքերում։ Մենք պետք է ստեղծենք համապատասխան փոխհատուցման մեխանիզմ, և մենք առաջարկում ենք դրա ստեղծման ձևը։ Ուկրաինան արդեն պատրաստել է համապատասխան նախագիծ։ Խնդրում եմ աջակցել թե՛ Եվրոպայում, թե՛ ՄԱԿ-ի Գլխավոր ասամբլեայի մակարդակով։ Հատկապես, որ ռուսական ակտիվների առյուծի բաժինը կենտրոնացած է Եվրոպայում, ինչպես պետության, այնպես էլ կոռումպացված մարդկանց և ագրեսոր պետության հետ առնչվող կոռումպացված բիզնեսների։ Ռուսական ակտիվները պետք է ուղղվեն պատերազմի պատճառած վնասի փոխհատուցմանը»,- ասել է Ուկրաինայի նախագահը։

Զելենսկու խոսքով՝ Ուկրաինայի ճանապարհը դեպի խաղաղություն եվրոպական ճանապարհն է. «Երկխոսության և սկզբունքների ուղին, պատերազմական հանցագործներին պատասխանատվության ենթարկելու և վնասների հատուցման ճանապարհը հաղթանակի ճանապարհն է։ Այն շատ ավելի կարճ է, քան թվում է, բայց միայն պայմանով, որ երկխոսությունը լինի նաև ազնիվ՝ նրանց միջև, ովքեր իսկապես գնահատում են ազատությունը, և որ «երկխոսություն» բառը չի քողարկում պատերազմի վրա աչք փակելու ցանկությունը»։

Ռուսաստանն արդեն ճանաչվել է ահաբեկչությանը աջակցող պետություն Լիտվայի և Լատվիայի օրենսդիր մարմինների կողմից։ Այս հարցը քննարկվում է նաև Էստոնիայի խորհրդարանում։

Եվրոպայի խորհուրդը միավորում է 46 երկիր։ Վրաստանը Եվրոպայի խորհրդի անդամ է 1999 թվականից։