Ֆրանսիայում արտահերթ խորհրդարանական ընտրությունների երկրորդ փուլում հաղթել է ձախակողմյան դաշինքը՝ «Նոր ժողովրդական ճակատը» և Ազգային ժողովում ստացել 182 մանդատ։ Երկրորդ տեղը զբաղեցրել է նախագահ Էմանուել Մակրոնի կենտրոնամետ կոալիցիան (168 մանդատ), երրորդ տեղում է Մարին Լը Պենի ծայրահեղ աջ «Ազգային միությունը», որը կունենա 143 մանդատ։
Լրահոս
Ընթերցողի ընտրանի
- 1 Իլիայի պետական համալսարանին ավտորիզացիա է տրվել մեկ տարի հետո մոնիտորինգի պայմանով
- 2 Խազարաձեն ներողություն է խնդրում հայերից իշխող կուսակցության «այլատյաց պոռթկումների» համար
- 3 Իվանիշվիլին պատերազմ հայտարարեց մեր բարեկամներին, որպեսզի կանգնի Մոսկվայի կողքին․ Զուրաբիշվիլի
- 4 Նման ամոթալի բան չեմ տեսել, պատրաստվել է ԿԳԲ-ի դարբնոցում․ նախագահը՝ «Երազանքի» պաստառների մասին
- 5 Պուտինի որոշմամբ Վրաստանի քաղաքացիների համար ընդլայնվել է առանց վիզայի ռեժիմը
- 6 Նախագահը կուսակցությունների հետ խորհրդակցություններ է սկսում տեխնիկական կառավարության կազմի շուրջ
Նրանց հաջորդում են պահպանողականները «Հանրապետական կուսակցությունից»՝ 45 մանդատով։ Մնացած մանդատները կիսում են անկախ պատգամավորները և փոքր արհմիությունների ներկայացուցիչները:
577 անդամ ունեցող խորհրդարանում ոչ մի քաղաքական ուժի չի հաջողվել ստանալ մեծամասնություն կամ 289 մանդատ, ինչը նշանակում է, որ կառավարություն ձևավորելու համար անհրաժեշտ կլինի կոալիցիա կազմել։
«Նոր ժողովրդական ճակատը» միավորում է ծայրահեղ ձախ, կոմունիստական, սոցիալ-դեմոկրատական ուժերին ու «Կանաչներին»։ Դաշինքի առաջնորդներից Ժան-Լյուկ Մելանշոնն արդեն մերժել է ձախ կուսակցությունների և Մակրոնի ցենտրիստական դաշինքի միջև կոալիցիա ստեղծելու հնարավորությունը։ Նա Ֆրանսիայի նախագահին կոչ է արել «Նոր ժողովրդական ճակատին» թույլ տալ ինքնուրույն ձևավորել կառավարություն։
Նախագահ Էմանուել Մակրոնը նույնպես պատրաստ չէ կոալիցիա կազմել ձախակողմյան ուժերի հետ։ Այս մասին նա բազմիցս հայտարարել է նախընտրական քարոզարշավի ժամանակ։
«Ազգային միության» առաջնորդներ Մարին Լը Պենն ու Ջորդան Բարդելան նույնպես բացառել են կոալիցիոն կառավարությանը մասնակցելու հնարավորությունը։
Ընտրությունների նախնական արդյունքները հրապարակելուց հետո վարչապետ Գաբրիել Ատալը հայտարարել է իր հրաժարականի մասին։ Նա իր որոշումը բացատրել է նրանով, որ երկրի ներկայիս ղեկավարի ցենտրիստական կոալիցիան չի ստացել Ազգային ժողովում մանդատների մեծամասնությունը։ Նրա խոսքով, ինքը կմնա վարչապետի պաշտոնում մինչև նոր կառավարության ձևավորումը։
Մեկ շաբաթ առաջ կայացած ընտրությունների առաջին փուլում «Ազգային միությունը» զբաղեցրեց առաջին տեղը և սպասվում էր բարձր աջակցություն երկրորդ փուլում, սակայն ձախերի կոալիցիան և Մակրոնը միավորվեցին՝ կանխելու ծայրահեղ աջերի հաղթանակը։
Վրաստանի նախագահ Սալոմե Զուրաբիշվիլին արձագանքել է ընտրությունների արդյունքներին.
«Ֆրանսիան ընտրեց Եվրոպան, ժողովրդավարությունն ու նրա արժանապատվությունը։ Մակրոնը գործեց սեփական ժողովրդի հույսով, և ժողովուրդն այս մեծ մարտահրավերին արձագանքեց աննախադեպ մոբիլիզացիայով։ Վճռական պահին ընտրությունը ժողովրդի ձեռքում է»,- ասել է Զուրաբիշվիլին՝ էքզիթփոլերի արդյունքների հայտնի դառնալուց հետո։ Ավելի ուշ նա հավելել է, որ ընտրությունների արդյունքը հաղթանակ և հույս է Եվրոպայում բոլորի համար, ովքեր դիմադրում են Ռուսաստանի ջանքերին։
Նախագահ Մակրոնն արտահերթ խորհրդարանական ընտրություններ է նշանակել այն բանից հետո, երբ աջ պոպուլիստները հաղթեցին Ֆրանսիայում հունիսին կայացած Եվրախորհրդարանի ընտրություններում։
