Գախարիայի խոսքով՝ իր վրա հարձակումը պատվիրել է Իվանիշվիլին, ով «երկար ժամանակ սպառնում էր իրեն»

«Դա նախապես կազմակերպված դարանակալում էր, քաղաքական հաշվեհարդար։ Հարձակման պատվիրատուն՝ Բիձինա Իվանիշվիլին։

Իվանիշվիլին երկար ժամանակ սպառնում է ինձ և իմ ընտանիքին տարբեր ձևերով ու ուղիներով, այդ թվում՝ հրապարակային։ Ինձ չեն հետաքրքրում այս հարձակման հեղինակները։ Ես գործ ունեմ իմ դեմ հարձակումների և քաղաքացիների նկատմամբ բռնության պատվիրատուի հետ։

Ինչ վերաբերում է հետաքննությանը, մենք նրանց հնարավորություն ենք տալիս փրկել իրենց դեմքը և չդառնալ բռնի հանցագործությունների մեղսակից»,- գրել է Գախարիան Facebook-ում։

Մինչ Ֆեյսբուքում հայտարարություն հրապարակելը Գիորգի Գախարիան եղել է Գլխավոր դատախազությունում։ Նա լրատվամիջոցների հետ զրույցում չի մեկնաբանել հարցաքննության մանրամասները և ասել է, որ վաղը ճեպազրույց կանցկացնի։

Գիորգի Գախարիան «Շերատոն Բաթումիում» հունվարի 15-ին, ուշ գիշերին ֆիզիկական բռնության է ենթարկվել «Վրացական երազանքի» ներկայացուցիչների, այդ թվում՝ ոչ լեգիտիմ խորհրդարանի պատգամավոր Դիմիտրի Սամխարաձեի և Աջարիայի ֆինանսների և էկոնոմիկայի փոխնախարար Գիորգի Մանվելիձեի կողմից։ Մինչ այդ նույն խումբը հարձակվել էր լրագրող Զվիադ Քորիձեի վրա։

«Շերատոն Բաթումին» հրաժարվել է հրապարակել հարձակման կադրերը։ Հունվարի 22-ին Գախարիայի կուսակցությունը հայտարարել է, որ դատախազությունը հյուրանոցից վերցրել է «ամբողջ սերվերի ենթակառուցվածքը»՝ կադրերը իրենց և հանրության համար անհասանելի դարձնելու համար։ «Հանուն Վրաստանի» կուսակցությունը կարծում է, որ «Շերատոն Բաթումին» «ռեժիմի մեղսակիցն է Գիորգի Գախարիայի նկատմամբ քաղաքական հաշվեհարդարի հարցում»։

Միջադեպը հետաքննվում է Քրեական օրենսգրքի 126-րդ հոդվածով, որը վերաբերում է բռնությանը։ Ընթացվող հետաքննության մանրամասներն անհայտ են։