Գորիի սակրեբուլոյի նախագահ. «ԵՄ-ն ինչ արել է, երկու անգամ ավելի շատ վերցրել է»

«Այստեղ երկրի դավաճանների տեղը չէ։ Վրաստանը ծախում են, ծախում են։ ... Ես նկատի ունեմ՝ ով այսօր Եվրամիության հետ է, ով պաշտպանում է այդ բանաձևը, Վրաստանի դավաճանն է։ Դուք քնա՞ծ եք, տեսեք թե ինչ է կատարվում Եվրոպայում։ Ի՞նչ արեցին Ուկրաինայի հետ... արթնացե՛ք...

Եվրամիությունը վերցրել է երկու անգամ ավելի, քան արել է մեզ համար։ Ի՞նչ է վերցրել: Շատ բաներ կան։ Թեկուզ ֆինանսավորել է այն գործակալներին, ովքեր ներկայումս կռվում են Վրաստանի դեմ»,- լրագրողներին ասել է Ռազմաձեն։

Գորեցի քաղաքացիական ակտիվիստները գնացել են սակրեբուլոյի նիստին այն բանից հետո, երբ, ըստ նրանց, Դավիթ Ռազմաձեն հայտարարել է, որ Գորին Եվրամիության կողմից ուղղակի ֆինանսավորում չի ստանում։

«Ի՞նչ է նշանակում՝ չի ստանում, երբ ես կարող եմ դուրս տանել ու ցույց տալ վերանորոգված շատ դպրոցներ։ Ցույց տալ այն քոթեջները, որոնք կառուցվել են տեղահանվածների համար ԵՄ ֆինանսավորմամբ, որ նրանք այսօր ապրելու տեղ ունեն և Կվեկվեսկիրիի նման ինքնասպան չեն լինում: Այս փախստականներին տեղավորել է Եվրամիությունը»,- ասել է Թեոնա Բզիշվիլին։

Երեկ՝ փետրվարի 13-ին, Եվրախորհրդարանը ընդունել է Վրաստանի վերաբերյալ հերթական քննադատական ​​բանաձևը, որում նա հրաժարվում է ճանաչել «Վրացական երազանքի» ինքնահռչակ կառավարությունը և երկրում ճգնաժամից դուրս գալու միակ ելքը համարում է առաջիկա մի քանի ամիսների ընթացքում նոր խորհրդարանական ընտրությունների անցկացումը։ Բացի այդ, Եվրախորհրդարանի պատգամավորները կոչ են անում Եվրոպական խորհրդին և ԵՄ անդամ երկրներին անձնական պատժամիջոցներ կիրառել Վրաստանում այն ​​անձանց նկատմամբ, ովքեր պատասխանատու են երկրի ժողովրդավարական հետընթացի, ընտրակեղծիքների, մարդու իրավունքների ոտնահարման և քաղաքական հակառակորդների և ակտիվիստների հետապնդումների համար:

Ըստ «Վրացական երազանքի»՝ բանաձևը, որն ընդունվել է 400 կողմ, 63 դեմ ձայներով, «ուղղված է Վրաստանի և վրաց ժողովրդի կողմից ընտրված կառավարության դեմ»։ Բացի այդ, կուսակցության քաղխորհուրդը հայտարարել է, որ լուրջ չեն վերաբերվում Եվրախորհրդարանին։