Գուրիայում հարձակվել են «Մթավարի արխիի» նկարահանող խմբի վրա

Հեռուստաընկերության տվյալներով՝ նկարահանող խումբը Սուփսայում ռեպորտաժ է պատրաստել, իսկ հարձակումից քիչ առաջ նրանք աշխատել են ոստիկանական բաժանմունքի մոտ։

«Մենք կենտրոնում էինք։ Սկզբում մի մարդ եկավ մեքենայով, հայհոյեց մեզ, սկսեց հայհոյել «Մթավարի արխիին», իսկ հետո՝ որոշ անձանց։ Մենք ուշադրություն չէինք դարձնում, քանի որ հասկանում էինք, թե ինչի հետ գործ ունենք։ Հետո նա դուրս եկավ մեքենայից ու սկսեց հայհոյել մեզ։ Դրան էլ որ ուշադրություն չէինք դարձնում, եկավ, թքեց երեսիս ու հարվածեց։ Ես բռնեցի նրա ձեռքը և դարձրի դեպի մեքենան։ Այդ ժամանակ մեզ վրա հարձակվեցին չորս հոգի։ Կարծես պատրաստ էին իրադարձությունների զարգացմանը։ Ֆիզիկական բռնություն գործադրեցին ու կոտրեցին տեսախցիկը»,- ասել է Լադո Մենաբդեն։

«Մթավարի արխիի» թղթակիցն ասում է, որ հարձակվողները վնասել են նրա գլուխը, ինչի պատճառով շտապ բուժօգնության կարիք է ունեցել։