Ինչո՞ւ է դպրոցի տնօրենը թաքցրել 14-ամյա աղջկա առևանգումը. Իսմայլովը հերքում է մեղադրանքները

Հոկտեմբերի 6-ին, երբ «Վրաստանի լուրերը» պարզեց Սագարեջոյի Լամբալո գյուղում սպանված աղջկա ինքնությունը, մենք հեռախոսով կապ հաստատեցինք դպրոցի տնօրենի հետ և հարցրինք, թե ինչու վերջին երեք շաբաթվա ընթացքում, երբ հանրային դպրոցներում սկսվել է ուսումնական գործընթացը, իսկ աղջիկը դպրոց չի ներկայացել, նա այդ մասին չի հայտնել ոստիկանությանը կամ սոցիալական ծառայություններին։ Օրենսդրությունը պարտավորեցնում է դպրոցի տնօրինությանը նման փաստերի վերաբերյալ անհապաղ տեղեկություն տրամադրել համապատասխան ծառայություններին։

«Երեկ էլ է դպրոցում եղել»,- մեզ հետ զրույցում ասաց դպրոցի տնօրենը։

- Այթաջ Շախմարովա, 8-րդ դասարանում, այս անուն-ազգանունով այլ աշակերտ ունե՞ք:

- Ոչ, մեկն է:

- Ինչպե՞ս էր նա երեկ դասի նստել, երբ ամառվանից հետո առևանգված է եղել, սեպտեմբերին ընդհանրապես դպրոց չի եկել, իսկ այս ամբողջ ընթացքում ոչ մեկին տեղյակ չեք պահել այդ մասին։ Դուք գիտե՞ք, որ նա սպանվել է:

- Սպանվե՞լ։

- Այո, այսօր սպանվել է։ Երկու ամիս է՝ Լամբալո գյուղում է, իսկ երեկ դասերին ինչպե՞ս էր Դմանիսիում։

Դրանից հետո դպրոցի տնօրենը դադարեցրեց շփվել մեզ հետ։

«Վրաստանի լուրերն» այսօր առավոտյան կրկին զրուցել է դպրոցի տնօրենի հետ։ Գամլետ Իսմայլովն այժմ ասաց, որ դասարանի ղեկավարը զրուցել է Այթաջի մոր հետ, ծնողը հոկտեմբերի 5-ին եկել է նաև դպրոց և խոստացել, որ աղջիկը երկու օրից կգա դասերի։

Քաղաքացիական ակտիվիստ Սամիրա Բայրամովան դպրոցի տնօրեն Գամլետ Իսմայլովի մասին տեղեկություն է տարածել, որ մի քանի տարի առաջ նա նույնպես ամուսնացել է անչափահաս աղջկա՝ իր աշակերտի հետ, ինչը դպրոցի տնօրենը հերքում է և ասում, որ դատի է տալու Բայրամովային զրպարտության համար։

«Այս օրերին անցկացրել են նույն գյուղի մեծամասնական պատգամավորի անչափահաս աղջկա հարսանիքը։ Նա նույնպես երկու տարի նշանված է եղել, դպրոց չի գնացել։

2015 թվականին Գամլետը ամուսնացել է 15-ամյա աղջկա հետ, ով եղել է իր աշակերտը։ Հետո պարզվում է, որ գյուղը դիմել է ՆԳ նախարարություն՝ Գամլետի ու անչափահաս աղջիկների հետ ընտանիք կազմած այլ անձանց դեմ։ Սկսվել է հետաքննություն։ Բոլորին տուգանել են, բացի Գամլետից։

Դպրոցի տնօրենը թաքցրել է բազմաթիվ անչափահասների նշանադրության փաստը, նշանված աղջիկները դպրոց չեն գնացել, բայց նրանց գնահատականներ են դրել։

Այթաջին նշանադրել են (ամուսնության համար) 2022 թվականի դեկտեմբերին։ Երբ նրան նշանադրել են, մայրը գնացել է դպրոց, խոսակցություն է եղել տնօրենի հետ, և այս տարիների ընթացքում տնօրենը հոգ էր տանում ոչ միայն Այթաջի, այլ նաև մյուս աղջիկների մասին։ Նա մի քանի անգամ սպառնացել է դպրոցի ուսուցիչներին, որ կհեռացնի դպրոցից, իսկ ուսուցիչները դպրոց չգնացող աշակերտներին գնահատականներ են դրել։

Ինչ վերաբերում է Այթաջի առևանգման դեպքին, ապա պարզվում է, որ մայրը Այթաջին տարել է Մառնեուլի` համոզելով, թե ինչ-որ գործ ունեն և ցանկացել է նրա համար հագուստ գնել։ Մառնեուլիում նրան սպառնացել է, որ պետք է ամուսնանա այդ տղայի հետ։ Լիովին անպաշտպան Այթաջը այլընտրանք չի ունեցել։ Այդ պատճառով նա երկու ամիս մնացել է տղայի տանը, քանի որ մայրն ավելի վատ է վարվել նրա հետ։

Երբ այս պատմությունը հայտնի դարձավ բոլորին, դպրոցի տնօրենը ուսուցիչներին և Այթաջի դասընկերներին կանչել է իր սենյակ և երկու ժամ շարունակ սպառնացել նրանց։ Նա բազմիցս ասել է, որ ունի աջակիցներ՝ Դմանիսիի կրթական ռեսուրս կենտրոնը, սակրեբուլոն, կրթության նախարարությունը պաշտպանում են իրեն և այս հարցում պաշտպանելու են բոլոր ուսուցիչներին։ Ուստի ուսուցիչները համաձայնել են, որ կասեն այն, ինչ անհրաժեշտ է։

«Այթաջի հայրը կնոջը և դպրոցի տնօրենին է մեղադրում աղջկա սպանության մեջ»,- գրում է Սամիրա Բայրամովան։

«Վրաստանի լուրերի» հետ զրույցում դպրոցի տնօրենը հերքել է Սամիրա Բայրամովայի կողմից հնչած բոլոր մեղադրանքները։ Գյուղի մեծամասնական պատգամավորի աղջկա հետ կապված դրվագի մասին նա ասել է, որ աղջիկը դուրս է եկել դպրոցից, սովորել է քոլեջում և անչափահաս տարիքում չեն ամուսնացրել։

Մինչ այժմ մեզ չի հաջողվել Դմանիսիի կրթական ռեսուրս կենտրոնից և կրթության նախարարությունից տեղեկություն ստանալ, թե արդյոք Այթաջի սպանությունից հետո ներքին հետաքննություն է սկսվել։

Հոկտեմբերի 6-ին Սագարեջոյի Լամբալո գյուղում սպանվել է 14-ամյա Այթաջ Շախմարովան։ Երեխային ատրճանակով կրակել է 26-ամյա Ալի Սադիգովը, ով ամռանն առևանգել է աղջկան՝ նրա հետ ամուսնանալու համար և Քվեմո Քարթլիից տարել է Կախեթի։

Դատախազության հայտարարության համաձայն՝ անչափահասը չի ցանկացել ապրել առևանգողի հետ, կարողացել է փախչել, անծանոթի բջջային հեռախոսով կապվել մոր հետ և հայտնել իր առևանգման մասին, ինչի մասին հայտնի է դարձել նաև առևանգված երեխայի հորեղբորը, թեև նրանք ստիպել են աղջկան ապրել առևանգողի հետ։

Սպանությունից հետո մեղադրյալը դեպքի վայրից դիմել է փախուստի։ Նա ձերբակալվել է չորս օր տևած հետախուզումից հետո։ Ալիմ Սադիգովը չի ընդունում դիտավորյալ սպանությունը։ Ասում է, որ զենք գործածել չի իմացել ու միայն ցանկացել է աղջկան վախեցնել։

«Ես անչափահասի հետ չեմ ամուսնացել։ Նրա մայրն ինձ ասում էր, որ նա 18 տարեկան է»,- դատական ​​նիստին ասել է մեղադրյալը։ Դատավորը նրա նկատմամբ որպես խափանման միջոց է կիրառել կալանքը։ Եթե ​​նա մեղավոր ճանաչվի, նրան սպառնում է 16-ից 20 տարի կամ ցմահ ազատազրկում: Դատախազությունը շարունակում է քննությունը՝ պարզելու երեխայի հնարավոր բռնաբարության փաստը։

Դատախազության պահանջով Ռուսթավիի դատարանը հոկտեմբերի 11-ին կալանավորել է սպանված աղջկա մորն ու հորեղբորը։ Դատախազի խոսքով՝ 14-ամյա աղջկա այսպես կոչված նշանադրության, այսինքն՝ հանցագործության կազմակերպիչը մայրն է եղել։ «Մայրն է եղել այն անձը, ում դուր է եկել տարիքով մեծ տղամարդը, հետևաբար՝ հարուստ, մայրն է եղել կազմակերպիչը, որ տեղի ունենա իր աղջկա և այս տղամարդու միջև նշանադրությունը, իսկ հետո, երբ արդեն առևանգված աղջիկը զանգահարել և օգնություն է խնդրել նրանից, հենց մայրն է եղել այն անձը, ով այս երեխային վերադարձրել է առևանգողին»,- ասել է դատախազը։

Դատախազությունը աղջկա մորն ու հորեղբորը մեղադրում է նրան ստիպողաբար ամուսնացնելու և հանցագործության մասին չհայտնելու մեջ։ Նրանց սպառնում է մինչև 6 տարվա ազատազրկում։