Ինչպե՞ս է Կոբախիձեն վերադարձնելու Աբխազիան և Հարավային Օսիան, որոնց մենք ենք պաշտպանում. Զատուլին

«Ես չգիտեմ, թե ինչով է ոգեշնչվել Վրաստանի վարչապետը, բացի իր հայրենասիրությունը դրսևորելու ցանկությունից։

Ես իսկապես չեմ հասկանում, թե ինչպես է նա մինչև 2030 թվականը վերադարձնելու Աբխազիան և Հարավային Օսիան, որոնք զարգանում են որպես անկախ պետություններ՝ Ռուսաստանի պաշտպանության ներքո և որպես այդպիսին ճանաչված։

Ինձ մոտ տպավորություն է ստեղծվել, որ այս կերպ Վրաստանի վարչապետը ևս մեկ անգամ ցանկանում է իրեն հռչակել որպես քաղաքական գործիչ, ով Եվրամիությանն անդամակցելու կամ Աբխազիայի ու Հարավային Օսիայի վերադարձի հավակնությունը ոչ մի դեպքում չի զիջում ընդդիմությանը»,- ասել է Զատուլինը։

Դումայի պատգամավորը կարծում է, որ այստեղ մեծ դեր է խաղում այսպես կոչված «օտարերկրյա գործակալների» մասին օրենքը, որը Վրաստանում բողոքի ակցիաների առիթ է դարձել.

«Դա, ամենայն հավանականությամբ, պայմանավորված է ներքաղաքական պայքարով, որը սրվել է Վրաստանում՝ կապված օտարերկրյա գործակալների մասին օրենքի ընդունման հետ, և վրացական իշխանությունների ցանկությամբ, չնայած այն բանին, որ օրենքն ընդունվել է Արևմուտքի կարծիքին հակառակ, ցույց տալ, որ իրականում մենք Ռուսաստանի ազդեցության տակ չենք, մենք մեր առջև նպատակներ ենք դնում, որոնք դեմ են Ռուսաստանին, և դուք կարող եք հանգիստ լինել մեր քաղաքական որոշ առաջնահերթությունների վերաբերյալ, որոնք հակասում են Ռուսաստանի շահերին։ Նա [Կոբախիձեն] արդարանում է ներքին ընդդիմության և Արևմուտքի առաջ»,- ասել է Կոնստանտին Զատուլինը։

Վրաստանի վարչապետ Իրակլի Կոբախիձեն մայիսի 26-ին Անկախության օրվան նվիրված միջոցառման ժամանակ իր ելույթում ասել է, որ Վրաստանն անցնում է «Մովսեսի ճանապարհը», որը, ըստ նրա, անպայման երկիրը կտանի դեպի «ավետյաց երկիր»։ «Մեր «ավետյաց երկիրը», այսինքն՝ վրացական երազանքն է, Վրաստանի անկախության վերականգնման 40-ամյակին՝ 2030 թվականին ապրել միասնական և ուժեղ Վրաստանում՝ մեր աբխազ և օս եղբայրների և քույրերի հետ միասին։ Միասնական և ուժեղ Վրաստանը 2030 թվականին պետք է դառնա եվրոպական ընտանիքի լիիրավ անդամ»,- ասել է Կոբախիձեն։

Ըստ օկուպացված Աբխազիայի դե ֆակտո անվտանգության խորհրդի քարտուղար Սերգեյ Շամբայի, Աբխազիայի վերադարձը Վրաստանի արտաքին քաղաքական խնդիրն է, իսկ Աբխազիան ունի իր խնդիրները՝ «սա անկախ պետության կառուցումն է, պետական զարգացումն ու հզորացումը»։ Ըստ Շամբայի, Աբխազիան չի պատրաստվում քննարկել Վրաստանի հետ կոնֆեդերացիայի կամ այլ հարաբերությունների հարցեր։

Կոբախիձեին արձագանքել են նաև օկուպացված Ցխինվալիից։ Այսպես կոչված Հարավային Օսիայի Հանրապետության արտաքին գործերի նախարարությունը հայտարարել է, որ «կտրականապես անընդունելի» են համարում Վրաստանին միանալու մասին ցանկացած խոսակցություն։