Իրակլի Կոբախիձեն պաշտոնական այցով մեկնել է Գերմանիա

Կառավարության աշխատակազմի տվյալներով՝ ապրիլի 12-ին, դեմառդեմ և ընդլայնված կազմով հանդիպումներից հետո, Իրակլի Կոբախիձեն և Օլաֆ Շոլցը հանդես կգան համատեղ մամուլի ասուլիսով։

Մինչ վրացական պատվիրակության Գերմանիա մեկնելը, ապրիլի 10-ին Գերմանիայի դեսպան Պետեր Ֆիշերը հանդիպել է «Վրացական երազանքի» նախագահ Իրակլի Ղարիբաշվիլիին։ X սոցիալական ցանցում դիվանագետը հայտնել է, որ վարչապետ Իրակլի Կոբախիձեի և կանցլեր Օլաֆ Շոլցի «կարևոր հանդիպումից» առաջ Ղարիբաշվիլիի հետ զրույցի ընթացքում անդրադարձ է եղել «Գերմանիայի մտահոգություններին՝ կապված արտաքին ազդեցության թափանցիկության մասին օրենքի նախագծի և Եվրամիության 9 կետերի կատարման հետ»: Այս հարցերը նշված չեն «Վրացական երազանք» կուսակցության տարածած հայտարարության մեջ։

«Հանդիպմանը խոսվել է Վրաստանի և Գերմանիայի Դաշնային Հանրապետության միջև առկա բարեկամական հարաբերությունների և բազմաթիվ ոլորտներում հաջող համագործակցության հարցերի մասին։ Նշվել է, որ առավել ամրապնդվում է տարբեր ոլորտներում երկու երկրների երկարաժամկետ գործընկերության դրական դինամիկան։ Զրույցի ընթացքում անդրադարձ է եղել նաև Վրաստանում տիրող քաղաքական իրավիճակին և տարածաշրջանում ընթացող գործընթացներին»,- հաղորդում է «Վրացական երազանքը»։

Ապրիլի 5-ին «Վրացական երազանքի» կողմից այսպես կոչված «օտարերկրյա գործակալների» մասին ռուսական օրենքի վերաներկայացման կապակցությամբ Գերմանիայի Բունդեսթագի (Խորհրդարանի) արտաքին հարաբերությունների հանձնաժողովը մտահոգություն է հայտնել, իսկ ապրիլի 10-ին հանձնաժողովի նախագահ Միխայել Ռոթը X-ում գրել է, որ նշված օրենքը անհամատեղելի է ԵՄ անդամակցության հետ։

«Անկախ ու քննադատական ​​քաղաքացիական հասարակությունը ոչ թե ժողովրդի թշնամին է, այլ Եվրամիությանն անդամակցելու պայման։ «Վրացական երազանքը» պետք է լսի իր ժողովրդին՝ վրացիների 90%-ը ցանկանում է անդամակցել Եվրամիությանը, ոչ թե Պուտինի Ռուսաստանին»,- ասել է Միխայել Ռոթը։

Իշխող կուսակցությունը մտադիր է ռուսական օրենքը ընդունել մինչև գարնանային նստաշրջանի ավարտը, թեև դա կարող է վնասել Վրաստանի եվրաինտեգրման գործընթացին։