Իվանիշվիլիի կողքին ոչ ոք չի մնացել, ով նրան կասի, որ հիմար գաղափարներ է հղանում. Միտչել

«Այս օրենքի ընդունման հետ կապված հարցն այն է, թե ինչու և ինչու հիմա։ Շատերը ենթադրում են, որ դա գալիս է Մոսկվայից, Կրեմլում ինչ-որ մեկը վերցնում է հեռախոսը և զանգահարում Բիձինա Իվանիշվիլիին, ով Վրաստանի առաջատար ղեկավարն է, և ասում. «Մենք ուզում ենք, որ դա արվի: Կարծում եմ՝ հեշտ բացատրություն է ասել, որ Ռուսաստանը ցանկացել է, որ դա անեն, ինչը, իհարկե, հնարավոր է, բայց մեզ համար անհնար է իմանալ»,- ասել է Միտչելը։ Ըստ նրա՝ էական չէ՝ Իվանիշվիլին օրենքը Ռուսաստանի առաջադրանքին համապատասխան է ընդունել, թե ոչ, քանի որ Ռուսաստանը շահում է վերջնական արդյունքից։

«Վրաստանի առաջնորդ Բիձինա Իվանիշվիլիի քմահաճությունը, որը ֆորմալ դեր չունի Վրաստանի կառավարությունում, հաճախ թերագնահատվում է այստեղ՝ ԱՄՆ-ում և Արևմուտքում: Ահա թե ինչ է անում Բիձինան՝ նրա գլխում մի միտք է գալիս, նա ներկայացնում է այն ու շրջապատված է մարդկանցով, որոնց համար կյանքում գլխավոր խնդիրը նրան մոտ մնալն է, մոտ լինելը իշխանությանն ու փողին, որը Վրաստանում գալիս է նրանից։ Այսպիսով, ոչ ոք չի ասում. «Հեյ, դա բավականին հիմար գաղափար է», թեև դա իրականում բավականին հիմար գաղափար է: Այնպես որ, նա գործում է անդադար»,- նշել է Միտչելը։

Նրա խոսքով՝ այսպես կոչված «օտարերկրյա գործակալների» մասին օրենքը լավ է Ռուսաստանի համար, վատ է Վրաստանի, նրա ժողովրդավարական հետագծի և արևմտյան նկրտումների համար։

Լինքոլն Միտչելն անդրադարձել է նաև ԱՄՆ պատժամիջոցների կիրառման թեմային և ասել, որ ազդեցիկ անձանց և նրանց ընտանիքի անդամների նկատմամբ պատժամիջոցները կարող են ազդեցություն ունենալ։

Հելսինկյան հանձնաժողովը նշում է, որ վերջին մի քանի տարիների ընթացքում տարբեր երկրներում շատացել են «օտարերկրյա գործակալների» մասին ռուսական ոճի օրենքները, որոնք, չնայած արդարացվում են օտարերկրյա ֆինանսավորման և ազդեցության թափանցիկությունն ապահովելու պատրվակով, իրականում օգտագործվում են քաղաքացիական հասարակությանը վերահսկելու և սահմանափակելու համար։ Ըստ Հանձնաժողովի, այս երկրների կառավարությունները կեղծիքներ են տարածում, որ այդ օրենքները նման են թափանցիկության կամ լոբբիստական ​​օրենքներին Միացյալ Նահանգներում և այլ ժողովրդավարական երկրներում, որոնք ստեղծվել են գաղտնի օտար ազդեցությանը ավելի մեծ թափանցիկություն ապահովելու, քարոզչության և վնասակար արտաքին ազդեցության դեմ պայքարելու համար: Այսպես կոչված «օտարերկրյա գործակալների» մասին օրենքը՝ Հելսինկյան հանձնաժողովի կարծիքով քաղաքացիական հասարակությանը ճնշելու ավտորիտար գործիքը, «Վրացական երազանքի» խորհրդարանական մեծամասնությունն ընդունել է մայիսի 28-ին։