Կադիրովի հիմնադրամը օկուպացված Ցխինվալիում արվեստի դպրոց կկառուցի

 Հիմնարկեքի միջոցառումը տեղի է ունեցել հուլիսի 20-ին, որից հետո դե ֆակտո նախագահ Ալան Գագլոևը հայտարարել է, որ արվեստի դպրոցը կկոչվի Ախմաթ-Խաջի Կադիրովի անունով։ «Վստահ եմ, որ այս դպրոցը նոր լիցք կհաղորդի արվեստի և հանրապետության ողջ մշակութային ոլորտի զարգացմանը»,- ասել է Ալան Գագլոևը։

Ահմեդ Դուդաևն իր հերթին նշել է, որ արվեստի դպրոցի կառուցումն արտացոլում է Չեչնիայի ղեկավար Ռամզան Կադիրովի և Ալան Գագլոևի եղբայրական հարաբերությունները։

«Այս սոցիալական օբյեկտը և մեր հետագա կառուցողական փոխգործակցությունը՝ մեր ժողովուրդների եղբայրական հարաբերությունները, թող համարժեք պատասխան լինեն մեր բոլոր չարագործներին, մեր բոլոր թշնամիներին։ Մեր երկրների շուրջ ստեղծված իրավիճակի համատեքստը թելադրում է եղբայրական հարաբերությունների հաստատման անհրաժեշտությունը, ինչը մենք կանենք»,- ասել է Դուդաևը։

Ցխինվալիում արվեստի դպրոցի կառուցման շուրջ Գագլոևն ու Կադիրովը պայմանավորվել են Գրոզնիում կայացած հանդիպման ժամանակ։ Ռուսական լրատվամիջոցների փոխանցմամբ՝ շինարարությունը ֆինանսավորում է Կադիրովի հիմնադրամը, և դա Չեչնիայի Հանրապետության ղեկավարի նվերն է։ Օբյեկտի շինարարությունը նախատեսվում է ավարտել մինչև 2025 թվականի կեսերը։

Փետրվարին Կադիրովը այսպես կոչված Հարավային Օսիային ռուսական արտադրության 10 միավոր UAZ Patriot մակնիշի ավտոմեքենա էր փոխանցել, ինչպես նաև ֆինանսական օգնություն էր ցուցաբերել Վրաստանի օկուպացված շրջանի այսպես կոչված իրավապահ մարմիններին։