Քանի դեռ կա «Ազգային շարժումը», մենք բևեռացված ենք լինելու. «Իմեդի»-ի սեփականատեր

Այս մասին Ռուխաձեն հայտարարել է լրատվամիջոցների ղեկավարների և «Ազգային ժողովրդավարական ինստիտուտի» (NDI) դիտորդական առաքելության ներկայացուցիչների հանդիպումից հետո։

«Քանի դեռ կա «Ազգային շարժումը», իսկ «Ազգային շարժում» ես համարում եմ նաև այն կուսակցությունները, որոնք ժամանակին դրա մաս են կազմել, նույն «Ֆորմուլա»-ի հետևում կանգնածներին, «Մթավարի արխի»-ի հետևում կանգնածներին, նրանք, ովքեր կանգնած են «Տաբուլա»-ի հետևում, այս մարդիկ, մինչ այդ, իհարկե, մենք բևեռացված կլինենք, քանի որ երկրի 1/10-ը բանտարկված է եղել նրանց օրոք»,- հանդիպումից հետո լրագրողներին ասել է Իրակլի Ռուխաձեն։

«Ֆորմուլա» հեռուստաընկերության այն հարցին, թե ընդդիմադիր քաղաքական գործիչներ կհրավիրվե՞ն «Իմեդի»-ի եթերում, Ռուխաձեն ասել է, որ ինքը «Իմեդի»-ի սեփականատերն է, ոչ թե տնօրենը։

«Թրամփն էլ չի գնում, բանավեճերի չի մասնակցում, բայց ամերիկյան ընտրություններում իրեն հիանալի է դրսևորում։ Չեմ կարող ասել, թե ինչու է ինչ-որ մեկը գնում և ինչու չի գալիս։ Ես, օրինակ, «Ֆորմուլա»-ի սեփականատիրոջը թույլ չեմ տա ոտք դնի «Իմեդի», երբեք։ Տիկին Գյուլի Ալասանիան «Մթավարի արխի»-ի համասեփականատերերից է, և ես, բնականաբար, նրան և նրա հետ առնչվողներին թույլ չեմ տա մտնել «Իմեդի»-ի։ Գիորգի Վաշաձեին թույլ չեմ տա այնտեղ ոտք դնի։ Դրա պատճառով ես կորցրել եմ ամեն ինչ, երբ նա ռեգիստրի պետ էր։ Ինձ՝ Ամերիկայի քաղաքացուս, համարում էին ամերիկյան Սամոայի քաղաքացի և կորցրել եմ իմ ունեցվածքը: Ինչպե՞ս կարող եմ թույլ տալ Գիորգի Վաշաձեի մուտքը։

Քանի դեռ կա Միխեիլ Սաակաշվիլին, նրա կուսակցությունը, Վաշաձեները և մյուսները, բևեռացում կլինի, քանի որ մենք չենք կարող թույլ տալ, որ այդ մարդիկ հետ գան։ Քանի որ ես հստակ գիտեմ, թե ինչ են անելու, ես տեսել եմ այդ ֆիլմը։ Դրանցից ոչ մեկը Սաակաշվիլիի օրոք չի եղել։ Դուք գոյություն ունեք միայն «Վրացական երազանքի» շնորհիվ։

Ինձնից «Իմեդի»-ն խլեցին 2008 թվականին։ Մեզ հանդիպեց Կեզերաշվիլին, նա ինձ ասաց՝ «Բորջոմին» պետք է ձևակերպեմ իր ընկերոջ վրա։ Ես հրաժարվեցի ու հաջորդ օրը մեքենաս պայթեցրին։ Այս մարդը չպետք է վերադառնա քաղաքականություն»,- ասել է «Իմեդի»-ի սեփականատերը։

Լրատվամիջոցների ղեկավարների խոսքով՝ Իրակլի Ռուխաձեն քաղաքական հայտարարություններ է արել NDI-ի պատվիրակության հետ հանդիպման ժամանակ։ Ըստ «Մթավարի արխիի» գլխավոր տնօրենի տեղակալ Նինո Նակաշիձեի, Ռուխաձեն նախատել է կառավարությանը քննադատող լրատվամիջոցներին. «Նա մեզ և մյուս լրատվամիջոցներին մեղադրել է, որ մենք միայն քաղաքական նպատակներ ենք հետապնդում և ստում ենք։ Ինձ ամենաշատը գրավեց այն, երբ նա ասաց, որ Լեքսո Լաշքարավան մահացել է գերդոզավորումից: Նա հիմնականում փնովում էր մեզ բոլորիս և խոսում էր Սաակաշվիլիի ժամանակների մասին»,- ասել է Նակաշիձեն։

NDI-ի պատվիրակությունը հանդիպումներ է անցկացնում կառավարության, քաղաքական կուսակցությունների, քաղաքացիական հատվածի, լրատվամիջոցների և դիվանագիտական ​​կորպուսի ներկայացուցիչների հետ։ Միջազգային կազմակերպության վրացական գրասենյակից պարզաբանել են, որ մինչև 2024 թվականի խորհրդարանական ընտրությունները պատվիրակության անդամները կգնահատեն ընդհանուր քաղաքական միջավայրը և այն գործոնները, որոնք կարող են ազդել նախընտրական գործընթացների վրա։ Հիմնական եզրակացությունները պատվիրակությունը կհրապարակի զեկույցի տեսքով, իսկ մինչ այդ լրատվամիջոցներին մեկնաբանություն չի արվի։