Կառավարությունը լկտիաբար հարձակվում է ԱՄՆ-ի և ԵՄ-ի հետ հարաբերությունների վրա․ կոնգրեսականներ

«Սարսափելի է տեսնել, թե ինչպես է Վրաստանի կառավարությունը այդքան լկտիաբար հարձակվում իր ժողովրդի կամքի, ԱՄՆ-ի և Եվրամիության հետ իր հարաբերությունների վրա»,- ասվում է կոնգրեսականների հայտարարության մեջ:

Նրանք նշում են, որ ԱՄՆ-ը Վրաստանի հավատարիմ բարեկամն է, որը նրան անվտանգային, քաղաքական ու միլիարդավոր դոլարների ֆինանսական օգնություն է ցուցաբերում։

«Ռուսաստանը, ընդհակառակը, բերեց միայն անախորժություններ, ավերածություններ ու ռազմական օկուպացիա։ Համեմատությունները FARA-ի (Օտարերկրյա գործակալների գրանցման ակտ) կամ արևմտյան արտաքին ազդեցության մոնիտորինգի այլ մեխանիզմների հետ դիտավորյալ ապատեղեկատվություն են, որոնք կրկնում են Կրեմլի հնացած թեզերը:

Միացյալ Նահանգները մնում է վրաց ժողովրդի ժողովրդավարական և եվրաատլանտյան նկրտումների բարեկամը։ Մենք կշարունակենք աջակցել այս սկզբունքներին»,- ասել են Ուիլսոնն ու Քոհենը։

2024 թվականի ապրիլի 3-ին «Վրացական երազանքը» կրկին օրակարգ բերեց այսպես կոչված «օտարերկրյա գործակալների» մասին ռուսական օրենքը, որը մեկ տարի առաջ բազմահազարանոց բողոքի ակցիաներից հետո ետ կանչվեց, և եղավ խոստում, որ այն երբեք չի ընդունվի։ «Ռուսական օրենքը» պարտավորեցնում է անկախ լրատվամիջոցներին և ոչ կառավարական կազմակերպություններին, որոնք աշխատում են միջազգային կազմակերպությունների դրամաշնորհային աջակցությամբ և չեն վերահսկվում կառավարության կամ նրա հետ կապված խմբերի կողմից, գրանցվել որպես օտարերկրյա գործակալ։

Եվրոպական միությունը, ԱՄՆ Պետդեպարտամենտը, ՄԱԿ-ը և միջազգային կազմակերպությունները կոչ են արել Վրաստանի իշխանություններին չընդունել օրենք, որն անհամատեղելի է ԵՄ արժեքների հետ և սպառնում է ԶԼՄ-ների և քաղաքացիական հասարակության ազատությանը և գոյությանը։

Թբիլիսիում՝ խորհրդարանի մոտ, ապրիլի 15-ից բողոքի ցույցեր են ընթանում ընդդեմ ռուսական օրենքի։ Դրան հակառակ՝ «Վրացական երազանքը» ապրիլի 29-ին խորհրդարանի շենքի դիմաց «համընդհանուր հավաք» կանցկացնի՝ ի պաշտպանություն ռուսական օրենքի։ Հանրային ծառայությունների աշխատակիցներին պարտավորեցնում են մասնակցել ակցիային։