Լրագրող Գուրամ Ռոգավան կոտրվածքներ ունի դեմքի և պարանոցի շրջանում

«Պարանոցը ֆիքսված է։ Զննել են դիմածնոտային և նյարդավիրաբույժները: Այս պահին այն չի պահանջում վիրաբուժական միջամտություն։ Ներկա պահին նրա վիճակը բավարար է»,- լրագրողներին ասել է բժիշկը։

Գուրամ Ռոգավան աշխատում էր Ռուսթավելիի պողոտայում և լուսաբանում էր հատուկ նշանակության ջոկատների կողմից ցուցարարների ձերբակալությունը, երբ սաղավարտներով հատուկ ջոկատայիններից մեկը գաղտագողի մոտեցել է նրան ու հարվածել գլխին։ Հարվածն այնքան ուժեղ է եղել, որ լրագրողը վայր է ընկել։

«Այս անձը չի ճանաչվի, մենք չենք իմանա, թե ով է հարձակվել ինձ վրա։ Այս մարդիկ կանաչ լույս ունեին անելու հենց այն, ինչ արեցին ինձ հետ: Ամենակարևորը գիտեին, որ ես լրագրող եմ՝ ռեպորտաժ էի անում, խոսափող էր իմ ձեռքին... ծանր բանով հարվածեց, չգիտեմ՝ ձեռքին ինչ էր»,- ասել է Գուրամ Ռոգավան կլինիկայից։

Նոյեմբերի 28-ի լույս 29-ի գիշերը խորհրդարանի մոտ բողոքի ցույցը ցրելու ընթացքում առնվազն 20 լրագրող է տուժել։ Վիրավորվել են ինչպես հեռուստաընկերությունների, այնպես էլ առցանց լրատվամիջոցների աշխատակիցները։ Հանրային պաշտպանը բացահայտել է երեք լրագրողների նկատմամբ ոչ պատշաճ վերաբերմունքի դեպք։

Հատուկ ջոկատայինները սկսել են ցրել խաղաղ բողոքի ցույցը գիշերը ժամը 2-ի սահմաններում։ Ցուցարարների դեմ հատուկ միջոցներ, այդ թվում՝ ջրցան մեքենաներ և այսպես կոչված պղպեղի սփրեյ է կիրառվել։ Հանրային պաշտպանի գնահատմամբ՝ ՆԳՆ-ն խախտել է հավաքների ազատությունը, քանի որ քաղաքացիներին հատուկ միջոցներով ցրելու պահին ակցիան ունեցել է խաղաղ բնույթ։

«Տեսանյութում և տարածված տեղեկատվության մեջ հստակ ի հայտ են գալիս խաղաղ ցույցը ցրելու ժամանակ ցուցարարների, այդ թվում՝ քաղաքական գործիչների, ինչպես նաև լրագրողների և կալանավորների նկատմամբ հատուկ միջոցների անհիմն կիրառման բազմաթիվ դրվագներ, ենթադրյալ անհիմն ձերբակալությունների, բռնության ուղղակի դիտավորության և հստակ բացահայտվում են դիտավորյալ հետապնդումները»,- ասված է հանրային պաշտպանի հայտարարության մեջ։

Հանրահավաքի ընթացքում ոստիկանի պահանջին չենթարկվելու և մանր խուլիգանության պատրվակով վարչական կարգով ձերբակալվել է 43 մարդ։ Ներքին գործերի նախարարությունը հետաքննություն է սկսել քեական օրենսգրքի երկու հոդվածներով՝ 353-րդ պրիմա հոդվածը վերաբերում է ոստիկանի կամ հանրային հիմնարկի վրա հարձակմանը, իսկ 187-րդ հոդվածի երկրորդ մասը վերաբերում է ուրիշի գույքի ոչնչացմանը կամ հրկիզմանը։