Թբիլիսիի քաղաքային դատարանը «գործակալների մասին» ռուսական օրենքի դեմ մարտին տեղի ունեցած ցույցերի ժամանակ ձերբակալված «Գիրչի՝ ավելի շատ ազատություն» կուսակցության առաջնորդ Զուրաբ Ջափարիձեին և կուսակցության անդամ Նիկա Մոսիաշվիլիին մեղավոր է ճանաչել։ Երկուսն էլ տուգանվել են 2500-2500 լարիով։
Լրահոս
Ընթերցողի ընտրանի
- 1 Գուդաուրիի հնդկական ռեստորաններից մեկում հայտնաբերվել է 12 մարդու դի
- 2 Կոբախիձեի խոսքով՝ պետական ծառայողները և ուսուցիչները ընթերցանության ընկալման խնդիր ունեն
- 3 Եվրախորհրդարանը պահանջում է պատժամիջոցների ենթարկել «Երազանքի» առաջնորդներին և նոր ընտրություններ անցկացնել Վրաստանում
- 4 Նախագահի թեկնածու Միխեիլ Կավելաշվիլին բարձրագույն կրթություն չունի
- 5 Ցույցերի ժամանակ Թբիլիսիում է գտնվել Ռուսաստանի ոստիկանական արհմիությունների ասոցիացիայի ղեկավարը
- 6 Թող գա Իվանիշվիլին... նոր ընտրությունների օրը պետք է համաձայնեցվի մինչև դեկտեմբերի 29-ը. նախագահի կոչը
Փաստաբանի խոսքով՝ դատավոր Իրակլի Չիկաշուայի որոշումը կբողոքարկվի վերաքննիչ դատարանում։
«Ապացույցներով հաստատվում էր, որ Զուրաբ Ջափարիձեն և Նիկա Մոսիաշվիլին որևէ հանցագործություն չեն կատարել։ Մենք ունենք շարունակական տեսագրություններ, այդ թվում՝ խորհրդարանի շենքի տեսախցիկներից վերցված կադրեր, որոնք ապացուցում են, որ դատարանում ցուցմունք տված ոստիկաններն ընդհանրապես չեն եղել ձերբակալման վայրում և իրականում տվել են կեղծ ցուցմունքներ։ Նրանց պատասխանատվության հարցը պետք է բարձրացվի»,- ասել է փաստաբանը։
Զուրաբ Ջափարիձեն և Նիկա Մոսիաշվիլին վարչական կարգով ձերբակալվել էին մարտի 7-ի հանրահավաքին՝ մանր խուլիգանության և ոստիկանության պահանջներին չենթարկվելու պատրվակով։ Նրանք հերքում են ոստիկանների նկատմամբ բանավոր կամ ֆիզիկական հարձակումը։
Ջափարիձեի խոսքով՝ ապօրինի ձերբակալությունից հետո իրեն տեղափոխել են ապրիլի 9-ի փողոցում գտնվող պետական գերատեսչության բակ, որտեղ նրան հարվածել են ձեռքերով, ոտքերով ու մահակներով։
«Իրականում այս գործը Մոսիաշվիլիի և իմ ձերբակալության մասին չէ։ Սա մեր առևանգման գործն է: Մենք որևէ մեկին բանավոր կամ ֆիզիկական բռնության չենք ենթարկել։ Ընդհակառակը՝ այնտեղ հատուկ նշանակության ջոկատի անդամները սկսեցին ծեծել երիտասարդներին, այդ ժամանակ (տեսանյութում երևում է) ես մեջքով կանգնեցի հատուկ ջոկատայիններին՝ երեխաներին փակելու համար, և այդ ժամանակ նրանք ինձ հետ քաշեցին։ 5-6 հոգի քաշքշում էին ինձ ու հարվածում։ Դարպասի ներսում (ապրիլի 9-ի փողոցում դարպաս կա, որտեղից երբեմն դուրս են գալիս) շարունակեցին մեզ ծեծել ձեռքերով, ոտքերով, մահակներով։ Գլխիս վնասվածքները մահակներից են։
Ես ներսում շարունակեցի խոսել, ոստիկանների հետ էի խոսում, որից հետո կանգնելիս ծեծեցին, մեր ծնոտներին խփեցին։ Մեզ ասացին, որ եթե չավարտենք խոսակցությունը, կշարունակեն, որից հետո դադարեցի խոսել։ Նրանք հատուկ նշանակության ջոկատի ներկայացուցիչներ էին, բոլորը դիմակներով էին, ես ոչ մեկի դեմքը չգիտեմ, հիշում եմ միայն աչքերը»,- ասում էր Ջափարիձեն։
Ընդդիմադիր կուսակցության անդամները Թբիլիսիի քաղաքային դատարան են տեղափոխվել մարտի 9-ին՝ նախնական կալանքի ժամկետը լրանալուց հետո, սակայն նրանց գործընթացը հետաձգվել է առողջական վիճակի պատճառով։ Նիկա Մոսիաշվիլիի մոտ ախտորոշվել է գլխուղեղի ցնցում, և նա ստիպված է եղել տեղափոխվել հիվանդանոց։ Զուրաբ Ջափարիձեն նույնպես գլխի վնասվածքներ էր ստացել։
Հատուկ քննչական ծառայությունը հետաքննություն է սկսել ՆԳՆ աշխատակիցների կողմից Ջափարիձեի և Մոսիաշվիլիի նկատմամբ լիազորությունների հնարավոր չարաշահման փաստով։ Քննությամբ պարզվել է, որ նրանց բերման ենթարկելու վայրում գտնվող հանրային հիմնարկի տեսահսկման տեսախցիկների տեսագրող սարքը տեխնիկապես վնասվել է։
Ներքին գործերի նախարարությունը ձերբակալել է մարտի 7-9-ին Թբիլիսիում խորհրդարանի շենքի մոտ տեղի ունեցած բողոքի ցույցերի 135 մասնակիցների, այդ թվում՝ ԶԼՄ-ների ներկայացուցիչների։ Մանր խուլիգանության և ոստիկանության օրինական պահանջին չենթարկվելու պատրվակով վարչական կարգով բերման է ենթարկվել 133 անձ։ Երկու ձերբակալվածներին՝ Լազարե Գրիգորիադիսին և Թոռնիկե Ակոփաշվիլիին մեղադրանք է առաջադրվել ՆԳՆ քրեական օրենսգրքով նախատեսված հանցագործության՝ ոստիկանի վրա հարձակում գործելու համար։ Այս գործերով դատավարությունները դեռ չեն ավարտվել։
