Մեջվրիսխևի գյուղի հովիվն ազատ է արձակվել օկուպացված Ցխինվալիի մեկուսարանից

«Ես ու երկու համագյուղացիներս գյուղի կովերին էինք արածեցնում։ Երբ անասունները անցան օկուպացված տարածք՝ գնացի որ քշեմ, այդ ժամանակ ինձ ձերբակալեցին ռուս զինվորականները»,- ազատ արձակվելուց հետո ասել է Գիորգի Տերաշվիլին։

Պետական ​​անվտանգության ծառայության հաղորդագրության համաձայն՝ կալանավորին անհապաղ ազատ արձակելու համար ակտիվորեն օգտագործվել է ինչպես «թեժ գծի» մեխանիզմը, այնպես էլ կենտրոնական իշխանության տրամադրության տակ գտնվող մյուս բոլոր գործիքները։ Այսօր Էրգնեթիի անցակետում Տերաշվիլին հանձնվել է ՊԱԾ-ի ներկայացուցիչներին։

«Վրաստանի օկուպացված շրջաններում և օկուպացիոն գծի երկայնքով իրականացված բոլոր կործանարար գործողությունների պատասխանատվությունը կրում է օկուպացիոն ռեժիմը։ Կենտրոնական կառավարությունը միջազգային գործընկերների հետ միասին կշարունակի ակտիվորեն աշխատել օկուպացված տարածքներում անօրինական բանտարկված Վրաստանի բոլոր քաղաքացիներին ազատ արձակելու համար»,- ասված է ՊԱԾ-ի հայտարարության մեջ։

Ապրիլի 30-ին Ռուսաստանի օկուպացիոն ուժերը Քարելիի Դվանի գյուղի մոտ ձերբակալել են Վրաստանի քաղաքացիներ Չիտո Ախալկացիին և Գոչա Մամագուլաշվիլիին։ Նրանց ապօրինի կալանավորումը նույնպես տեղի է ունեցել անասուններին արոտավայր տանելու ժամանակ։ Նրանք երկուսն էլ ազատ են արձակվել մայիսի 3-ին։

Ապրիլի 21-ին օկուպանտները Ճվրինի գյուղի մոտ փորձել են առևանգել ամուսիններ Մևլուդ Խարազիշվիլիին և Էլզա Գոգալաձեին, ինչի ժամանակ տղամարդուն հարվածել են ոտքերով և ատրճանակի կոթով։

Ապրիլի 17-ին ձերբակալվել է Դվանի գյուղի բնակիչ Դիմիտրի Մամագլաշվիլին։ Նա ձերբակալվելու պահին իր համագյուղացիների հետ Սուրբ Զատիկն է նշելիս եղել գյուղի եկեղեցում։ Մամագուլաշվիլին Վրաստանի իրավապահներին է հանձնվել ապրիլի 20-ին այն բանից հետո, երբ դե ֆակտո դատարանը նրան տուգանել է պետական ​​սահմանը խախտելու համար և վտարել «Հանրապետությունից»։

Հարավային Օսիայի դե ֆակտո Պետական ​​անվտանգության կոմիտեն նշում է, որ ապրիլին ընդհանուր առմամբ ձերբակալվել է 45 մարդ. 21-ը՝ այսպես կոչված պետական ​​սահմանի ռեժիմը խախտելու, 24՝ սահմանային ռեժիմը խախտելու համար։ «25 անձի նկատմամբ նշանակվել է վարչական տույժ, 3 անձի նկատմամբ վարչական վտարում և տուգանք է կիրառվել, 15-ի դեպքում տրվել է նախազգուշացում, իսկ երկու անձի նկատմամբ վարչական վարույթը կարճվել է»,- հայտնում են կոմիտեից։

Ցխինվալիի բանտում անօրինական կալանքի տակ են գտնվում Վրաստանի հինգ քաղաքացիներ, որոնց թվում է նախկին զինվորական Մամուկա Չխիկվաձեն, ով ձերբակալվել էր 2021 թվականի դեկտեմբերին Գորիի մունիցիպալիտետի Նիքոզի գյուղի մոտ։ Այսպես կոչված սահմանն ապօրինի հատելուն զուգահեռ՝ նա մեղադրվում է թմրանյութերի մաքսանենգության մեջ։ 2022 թվականի մայիսին դե ֆակտո դատարանը Չխիկվաձեին դատապարտել է 5,6 տարվա ազատազրկման, որը բողոքարկվել է նրա տեղի փաստաբանի կողմից, ինչից հետո անօրինական պատիժը կրճատվել է մինչև 3,8 տարվա։