Մենք ձեռնպահ կմնանք Ուկրաինային լրացուցիչ արձագանքելուց․ ԱԳ նախարարություն

«Ցավալի է, որ պաշտոնական Կիևն այս քայլին է դիմում բարեկամ պետության և ժողովրդի դեմ։ Ուկրաինայի իշխանությունների բերած պատճառաբանությունը հատկապես անհասկանալի է դարձնում այս որոշումը։ Ստրասբուրգի դատարանի որոշումը վերջ դրեց դատապարտյալ Միխեիլ Սաակաշվիլիի առողջական վիճակի մասին ենթադրություններին, ինչը ևս մեկ անգամ հաստատեց Միխեիլ Սաակաշվիլիի իրավունքների պաշտպանության ամենաբարձր չափանիշները պետության կողմից»,- ասվում է նախարարության տարածած հաղորդագրության մեջ։

Վրաստանի արտաքին գործերի նախարարության գնահատմամբ՝ Ուկրաինայի իշխանությունների որոշումը էապես վնասում է երկու երկրների ռազմավարական հարաբերություններին և ուղղակի միջամտություն է ինքնիշխան պետության ներքին գործերին։

«Վրաստանի արտակարգ և լիազոր դեսպան Գիորգի Զաքարաշվիլին ուկրաինական կողմին է փոխանցել նաև Թբիլիսիի պաշտոնական դիրքորոշումը այսօր Կիևում Ուկրաինայի արտաքին գործերի նախարարությունում կայացած հանդիպման ժամանակ։

Ապագայում Վրաստանը կշարունակի համերաշխություն և աջակցություն հայտնել Ուկրաինային, որը պատերազմի մեջ է։

Հենց այն պատճառով, որ Ուկրաինան գտնվում է պատերազմի ակտիվ փուլում, վրացական կողմը, գիտակցելով իր մեծ պատասխանատվությունը միջազգային հարաբերությունների և հատկապես գործընկերների նկատմամբ, ի պատասխան Ուկրաինայի քայլերի այս փուլում ձեռնպահ է մնում ցանկացած լրացուցիչ արձագանքից և նրա հետ երկկողմ հարաբերությունների հետագա սրումից, ինչը փակուղի կբերի առանց այն էլ բարդ իրադրությանը», - հայտարարել են Վրաստանի արտաքին գործերի նախարարությունից։

Միաժամանակ նախարարությունը հույս է հայտնել, որ պաշտոնական Կիևը կվերանայի իր որոշումը և ջանքեր կգործադրի երկու երկրների միջև պատմական բարեկամական հարաբերությունների հետագա զարգացման համար։

Վրաստանի նախկին նախագահ Միխեիլ Սաակաշվիլին փետրվարից ի վեր առաջին անգամ մասնակցել է իր դատական նիստին։ Այսպես կոչված նոյեմբերի 7-ի գործով Թբիլիսիի քաղաքային դատարանում ընթացող նիստին նա «Վիվամեդ» կլինիկայից մասնակցել է հեռավար կարգով։ Նրա առողջական վիճակը գնահատվում է ծանր։

Օրվա վերջում Ուկրաինայի նախագահ Վլադիմիր Զելենսկին ասել է, որ Ռուսաստանը Վրաստանի իշխանության ձեռքով սպանում է Ուկրաինայի քաղաքացի Միխեիլ Սաակաշվիլիին և հանձնարարել է ԱԳՆ-ին կանչել Ուկրաինայում Վրաստանի դեսպանին և արտահայտել խիստ բողոք և խնդրել նրան 48 ժամվա ընթացքում հեռանալ Ուկրաինայից՝ Թբիլիսիում խորհրդակցությունների համար։

«Մենք բազմիցս կոչ ենք արել պաշտոնական Թբիլիսիին դադարեցնել այս վիրավորանքը և համաձայնել Սաակաշվիլիի վերադարձին Ուկրաինա։ Մեր գործընկերները, համաձայնեցնելով Ուկրաինայի հետ, մի շարք լուծումներ են առաջարկել։ Կոչ եմ անում մեր գործընկերներին կարգավորել այս իրավիճակը, չանտեսել ու փրկել այս մարդուն։ Եվրոպայում ոչ մի կառավարություն իրավունք չունի մահապատժի ենթարկել մարդուն, կյանքը հիմնական եվրոպական արժեքն է»,- գրել է Զելենսկին։

Սաակաշվիլին ձերբակալվել է 2021 թվականի հոկտեմբերի 1-ին՝ Թբիլիսիում, տեղական ինքնակառավարման մարմինների ընտրությունների նախօրեին։ Նա մեղավոր է ճանաչվել և վեց տարվա ազատազրկման է դատապարտվել պատգամավոր Վալերի Գելաշվիլիին ծեծի ենթարկելու և Սանդրո Գիրգվլիանիի սպանության համար դատապարտված Սահմանադրական անվտանգության վարչության աշխատակիցներին ներում շնորհելու գործերով։ Սաակաշվիլին մեղադրվում է նաև սահմանն ապօրինի հատելու, «Իմեդի» հեռուստաընկերության ներխուժման, նոյեմբերի 7-ի բողոքի ցույցը ցրելու, Պատարկացիշվիլիի ունեցվածքին ապօրինի տիրանալու և պետական ​​պաշտպանության հատուկ ծառայությանը պատկանող 9 024 367 լարիի յուրացման մեջ։ Երրորդ նախագահը մեղքը չի ընդունում, ասում է, որ քաղաքական հետապնդման է ենթարկվում և Պուտինի գերին է։