Միգրանտների թվի աճի պատճառով Իտալիայում արտակարգ դրություն է հայտարարվել

Արտակարգ դրության ընթացքում կառավարությունը 5 մլն եվրո կհատկացնի արտակարգ միջոցառումների համար, որոնք ներառում են «թեժ կետերի» բեռնաթափում, միգրանտների ընդունման նոր կառույցների ստեղծում և հետագայում Իտալիայում մնալու իրավական հիմք չունեցողների հայրենադարձում։

Reuters-ի փոխանցմամբ՝ անցյալ շաբաթավերջին աֆրիկյան երկրներից մոտ 1 700 միգրանտներ են ժամանել Լամպեդուզա կղզի, իսկ երկուշաբթի առափնյա պահպանությունը երկու նավակ փրկելու համար փրկարարական գործողություն է իրականացրել, որոնցում ընդհանուր առմամբ 1 200 մարդ է եղել։

Ծովային և քաղաքացիական պաշտպանության նախարար Նելլո Մուսումեչին ասել է, որ միգրանտների թվի աճը վտանգի տակ է դնում Իտալիայի ենթակառուցվածքները։ Նրա խոսքով՝ խոսքը մի երևույթի մասին է, որը նախկինում ոչ ոք չի տեսել. «Կղզիները չեն կարող միայնակ հաղթահարել այս արտակարգ իրավիճակները», - ասել է նա:

ՄԱԿ-ի Միգրացիայի միջազգային կազմակերպությունը (IOM) գրանցել է 2017 թվականից ի վեր միգրանտների մահվան ամենաբարձր թիվը։ Կազմակերպության տվյալներով՝ այս տարվա առաջին երեք ամիսներին Միջերկրական ծովով Եվրոպա հասնելու փորձի ժամանակ մահացել է 441 միգրանտ։ Փրկարարական աշխատանքների հետաձգման հետևանքով զոհվել է առնվազն 127 մարդ։ IOM-ի գլխավոր տնօրեն Անտոնիո Վիտորինոն մտավախություն ունի, որ այս իրավիճակն արդեն սովորական է դարձել։

«Ծովում մարդկանց փրկելը պետությունների պարտականությունն է»,- ասել է Վիտորինոն։ «Մեզ անհրաժեշտ է պետությունների կողմից որոնողափրկարարական աշխատանքների ակտիվ համակարգում։ Մենք պետություններին կոչ ենք անում համագործակցել և աշխատել միգրացիոն ուղիների վրա մահացության դեպքերը նվազեցնելու ուղղությամբ»:

Այս տարվա փետրվարին, երբ ավելի քան 60 միգրանտներ, այդ թվում՝ կանայք և երեխաներ, են զոհվել Կալաբրիայի մոտ փայտե նավակի խորտակման հետևանքով, Իտալիայի վարչապետ Ջորջա Մելոնին կոչ է արել Եվրամիությանը՝ ավելին անել անօրինական միգրացիան դադարեցնելու համար: