Մոսկվայի պատրիարքարանի հետ միասին կվերականգնենք Աբխազիայի եկեղեցին. Ապլիա

Նրա խոսքով՝ այն, որ «Աբխազիայի եկեղեցին» կանոնականորեն դարձել է Վրաստանի ուղղափառ եկեղեցու մաս, մեծ մասամբ քսաներորդ դարի քաղաքական իրադարձությունների արդյունք է։

«Խորհրդային վարդապետությունը նրան ինչ-որ կերպ մտցրեց վրացական եկեղեցի։ Այսօր չենք կարող ասել, որ աբխազները դա են ուզում։ Սա բացարձակ խելագարություն է։ Ես ուզում եմ, որ թե՛ ուղղափառները, թե՛ ոչ ուղղափառները հասկանան և համապատասխան եզրակացություն անեն, որ դա անընդունելի է։ Այս ամենը, մեղմ ասած, շտկման կարիք ունի»,- «Ափսնիպրես»-ի հետ զրույցում ասել է քահանան։

Իր իսկ հայտարարության համաձայն՝ այսօր «Աբխազական ուղղափառ եկեղեցին» փաստացի գտնվում է Ռուս ուղղափառ եկեղեցու թևի տակ, մինչդեռ Վրաց ուղղափառ եկեղեցին և «Աբխազական եկեղեցին» կապ չունեն միմյանց հետ։

«Փառք Աստծո, որ Տերն օգնեց մեզ փախչել նրանցից։ Այսօր ամենակարևորը Աբխազիայի ուղղափառ եկեղեցու վերականգնումն է, և մենք այն կվերականգնենք Մոսկվայի պատրիարքարանի հետ միասին»,- ասել է հոգևորականը։

Վրաստանի ուղղափառ եկեղեցում նման հայտարարությունները գնահատում են որպես եկեղեցու պատմության խեղաթյուրում և ասում են, որ «Աբխազիան պատմականորեն Վրաստանի մի մասն է թե՛ քաղաքական, թե՛ եկեղեցական առումներով»։

Աբխազիան, որը հայտնի է որպես Ցխում-Աբխազիայի թեմ, Վրաց ուղղափառ եկեղեցու կանոնական տարածք է, սակայն 1992-1993 թվականների հակամարտությունից հետո եկեղեցին չի կարող վերահսկողություն իրականացնել այս տարածքի վրա։ 2010 թվականին Սուրբ Սինոդի որոշմամբ թեմի կառավարումը փոխանցվել է Համայն Վրաստանի կաթողիկոս-պատրիարք Իլյա Երկրորդին։ Նշենք, որ Ռուսաստանի պատրիարք Կիրիլը մի քանի անգամ չի հիշատակել Վրաստանի կաթողիկոս-պատրիարքին՝ որպես Բիչվինայիի և Ցխում-Աբխազիայի միտրոպոլիտ։

Բացի «Աբխազական ուղղափառ եկեղեցուց», Աբխազիայում կա ևս մեկ չճանաչված ուղղափառ եկեղեցի։ «Աբխազիայի Սուրբ Մետրոպոլիսը» գլխավորում է սուրբ վարդապետ Դորոֆեյը (Դբարի):