Նախագահ Սալոմե Զուրաբիշվիլին ելույթ կունենա Եվրոպական խորհրդարանում

Մեցոլան Եվրախորհրդարանի համերաշխությունն է հայտնել Վրաստանի այն քաղաքացիներին, ովքեր խորհրդարանական ընտրություններից հետո վերջին մի քանի շաբաթների ընթացքում բողոքի ակցիա են իրականացնում Թբիլիսիի փողոցներում։

«Մենք տեսնում ենք ձեզ, լսում ենք ձեզ և կանգնած ենք ձեր կողքին», - ասել է Ռոբերտա Մեցոլան՝ կոչ անելով ԵՄ-ին վճռական քայլեր ձեռնարկել՝ ներառյալ խաղաղ ցուցարարների նկատմամբ բռնության համար պատասխանատու անձանց պատժամիջոցների ենթարկումը։

Սալոմե Զուրաբիշվիլիի ելույթը Եվրախորհրդարանում կսկսվի Թբիլիսիի ժամանակով 11:30-ին։ Վրաստանի ոչ լեգիտիմ վարչապետ Իրակլի Կոբախիձեն Եվրախորհրդարանի հրավերը «ներկայացում» է անվանել և այն համեմատել Ուկրաինայի նախագահ Վլադիմիր Զելենսկիի ելույթի հետ։

«Մեր ունեցած տեղեկություններն այն են, որ նրանք պատրաստվում են Սալոմե Զուրաբիշվիլիին հրավիրել Եվրախորհրդարանի նիստին, որտեղ փոքրիկ ներկայացում է տեղի ունենալու,

նրա առջև պետք է ոտքի կանգնենք, ինչպես Զելենսկիի դեպքում և իր ելույթն ավարտի ծափահարություններով։

Պարզ ներկայացումներով կոնկրետ պաշտոնյաներն ու քաղաքական գործիչները չեն կարողանա ազդել մեր երկրում իրադարձությունների զարգացման վրա, իսկ նման պարզ ներկայացումները ոչ մի ազդեցություն չեն ունենա»,- ասել է Կոբախիձեն։

Սալոմե Զուրաբիշվիլիին Եվրախորհրդարան հրավիրելու նախապատմությունը Վրաստանում նոյեմբերի 28-ից շարունակվող բողոքի ցույցերն են, որոնք հաջորդել են «Վրացական երազանքի»՝ Եվրամիությանն անդամակցելու գործընթացը կասեցնելու որոշմանը։ Բազմիցս ցրված հանրահավաքի մասնակիցները պահանջում են նոր խորհրդարանական ընտրությունների անցկացում և հանրահավաքի ընթացքում ձերբակալված անձանց ազատում։

Նշենք, որ նոյեմբերի 28-ին ընդունված բանաձևով Վրաստանում կայացած խորհրդարանական ընտրությունների արդյունքները չեն ճանաչվել նաև Եվրոպական խորհրդարանի պատգամավորների կողմից։