Նախագահի իմփիչմենթի գործընթացը չի նպաստում հանձնարարականների կատարմանը. ԵՄ դեսպան

«Կտեսնենք, թե ինչպես կավարտվի։ Բայց պարզ է, որ երբ այն դառնում է թիվ մեկ առաջնահերթությունը, ապա այս գործընթացը չի նպաստում ապաբևեռացմանը և ժամանակավրեպ է, ինչպես մի քանի շաբաթ առաջ Թբիլիսիում գտնվելու ժամանակ պարզաբանեց բարձրագույն ներկայացուցիչը՝ փոխնախագահ Ջոզեֆ Բորելը։

Այժմ գործը գտնվում է Վրաստանի Սահմանադրական դատարանում։ Ես ձեզ քիչ բան կարող եմ պատմել այս հարցի մասին: Սպասում ենք Սահմանադրական դատարանի որոշմանը։ Դատարանը պետք է որոշի՝ արդյոք նախագահը խախտել է սահմանադրությունը։ Եթե ​​ինձ հարցնեք, թե դա օգնո՞ւմ է ապաբևեռացմանը, ապա հստակ կասեմ՝ ոչ»,- ասել է դեսպանը։

Նա նաև ասել է, որ Եվրահանձնաժողովի 12 հանձնարարականների կատարման վերաբերյալ Վրաստանում ոչ միանշանակ պատկեր է առաջացել։

«Ես այստեղ եմ մեկ տարուց ավելի։ Ես շատ ուշադիր լսում եմ, թե ինչ են ասում տարբեր քաղաքական գործիչներ։ Որոշ քաղաքական գործիչներ պնդում են, որ Վրաստանը գործնականում կատարել է ամեն ինչ, ոմանք պնդում են, որ Վրաստանը գործնականում չի կատարել հանձնարարականներից և ոչ մեկը։

Եթե ​​իմ կարծիքն է ձեզ հետաքրքրում, կարծում եմ պատկերը խառն է։ Մի կողմից շատ բան է արվել, հատկապես վերջին շաբաթներին, ԵՄ բարձր ներկայացուցչի այցից հետո, մենք տեսնում ենք հսկայական արագացում, մյուս կողմից՝ դեռևս կան տարբեր ազդակներ Վրաստանից։

Հասարակական կազմակերպությունները և քաղաքացիական հասարակությունը դեռևս ճնշման տակ են։ Այնպես որ, որոշումը պետք է կայացնեն անդամ 27 երկրների ղեկավարները։ Մենք անկեղծորեն հուսով ենք, որ դեկտեմբերին տոնելու ենք, և այն ուղերձը, որ երեկ վարչապետը ստացավ Իսպանիայում եվրոպացի առաջնորդներից, անկեղծ է, և մենք բոլորս տոնելու ենք դեկտեմբերին»,- նշել է դեսպանը։

Խորհրդարանի անդամներ Իրակլի Կոբախիձեն, Շալվա Պապուաշվիլին, Մամուկա Մդինարաձեն և այլք (ընդհանուր առմամբ 80 պատգամավոր) 2023 թվականի սեպտեմբերի 12-ին դիմել են Սահմանադրական դատարան՝ նախագահի իմփիչմենթի պահանջով։ Իշխող կուսակցությունը նախագահին մեղադրում է սահմանադրությունը խախտելու մեջ, քանի որ չնայած կառավարության մերժմանը, Սալոմե Զուրաբիշվիլին այնուամենայնիվ սկսել է հանդիպումները եվրոպացի առաջնորդների հետ։ Սահմանադրական դատարանը հարցի քննարկումն ավարտել է հոկտեմբերի 5-ին և, ըստ Սահմանադրության, ունի մեկամսյա ժամկետ՝ եզրակացությունը պատրաստելու համար։ Եթե ​​Սահմանադրական դատարանը որոշի, որ Սալոմե Զուրաբիշվիլին խախտել է Սահմանադրությունը, ապա նախագահին հեռացնելու համար անհրաժեշտ է 100 պատգամավորի ձայն, ինչը «Վրացական երազանքը» խորհրդարանում չունի։ Ընդդիմությունը չի աջակցում նախագահի իմպիչմենտին։