Պրիգոժինին, ով սպառնացել էր դուրս բերել «Վագներին» Բախմուտից, խոստացել են զինամթերք տալ

«Երդվում են, որ ամեն ինչ արվելու է, որ թշնամին մեզ չվերջացնի։ Նրանք մեզ ասում են, որ մենք Բախմուտում կարող ենք գործել այնպես, ինչպես հարմար ենք համարում»,- ասել է Պրիգոժինը։

Գործարարի խոսքով՝ «Վագների» և Ռուսաստանի պաշտպանության նախարարության համագործակցության հարցերը կորոշի ՌԴ օդատիեզերական ուժերի գլխավոր հրամանատար և Ուկրաինայում ռուսական խմբավորման հրամանատարի տեղակալ Սերգեյ Սուրովիկինը։

Մայիսի 5-ին Պրիգոժինը հրապարակել էր «Վագների» զոհված մարտիկների ֆոնին արված տեսանյութ, որտեղ հայհոյում էր ՌԴ պաշտպանության նախարար Սերգեյ Շոյգուին և ԶՈՒ գլխավոր շտաբի պետ Վալերի Գերասիմովին։ Պրիգոժինը նրանց մեղադրում էր «Վագներականների» մահվան համար և պնդում, որ կորուստները առաջացել են զինամթերքի պակասից։ «Վագների» հրամանատարը սպառնացել էր մայիսի 10-ին հեռանալ Բախմուտից:

Եվգենի Պրիգոժինի հայտարարությանը մայիսի 6-ին արձագանքել է Չեչնիայի ղեկավար Ռամզան Կադիրովը՝ ասելով, որ պատրաստ է «Վագներականների» զբաղեցրած դիրքերը փոխանցել իր «Ախմատ» ջոկատին։ Պրիգոժինը հավանություն է տվել այս առաջարկին։

«Ես արդեն կապվել եմ նրա ներկայացուցիչների հետ, որպեսզի անհապաղ սկսվի դիրքերի փոխանցումը, որպեսզի մայիսի 10-ին, ժամը 00:00-ին, ճիշտ այն ժամանակ, երբ մենք լիովին կսպառենք մեր մարտական ​​ներուժը, մեր մարտական ​​ընկերները զբաղեցնեն մեր տեղը և շարունակեն մարտական ​​գործողությունները Բախմուտի համար»,- ասել է Պրիգոժինը:

Բախմուտի համար պայքարը շարունակվում է ավելի քան ինը ամիս։ Այնտեղ ռուսական ուժերի հիմնական մասը կազմում են «Վագներ» խմբավորման վարձկան մարտիկները։ Ուկրաինայի զինված ուժերի գլխավոր շտաբի տեղեկատվության համաձայն՝ Բախմուտում հակառակորդը ֆոսֆորային ռումբեր է օգտագործում։