ՌԴ նախագահ Վլադիմիր Պուտինը ստորագրել է օրենքը, որը վավերացնում է Մոսկվայի և Սոխումիի միջև ստորագրված երկքաղաքացիության մասին համաձայնագիրը։ Աբխազական անձնագիր ունեցողները կկարողանան Ռուսաստանի քաղաքացիություն ստանալ՝ առանց դե ֆակտո Աբխազիայի քաղաքացիությունից հրաժարվելու։ Ռուսները նույնպես իրավունք կունենան ստանալ Աբխազիայի «քաղաքացիություն»։
Լրահոս
Այսպես կոչված համաձայնագիրը ստորագրվել է Մոսկվայում՝ 2022 թվականի սեպտեմբերի 27-ին և հաստատվել Ռուսաստանի Դաշնության խորհրդի կողմից 2023 թվականի հուլիսի 5-ին։ Վրաստանի կառավարությունը չի արձագանքել այս հարցին։
«Երկքաղաքացիության մասին համաձայնագիրը վերաբերում է ազատ տեղաշարժի, սոցիալական երաշխիքների, առողջապահության, կրթության, անվտանգության, զինվորական ծառայության ճանաչման խնդիրների լուծմանը», - համաձայնագրի վերաբերյալ ասել է Աբխազիայի դե ֆակտո արտաքին գործերի նախարար Ինալ Արձինբան։
Նրա խոսքով, սա «Ռուսաստանի հետ եղբայրական հարաբերությունների և երկխոսության բարձր մակարդակի ևս մեկ ապացույց է»։
Փաստաթղթի համաձայն, այն անձինք, ովքեր 2008 թվականի օգոստոսի 26-ի դրությամբ ունեցել են Աբխազիայի քաղաքացիություն և պահպանել այն մինչև այսօր, կարող են պարզեցված ձևով ստանալ Ռուսաստանի քաղաքացիություն։
Աբխազիայի և Ռուսաստանի այսպես կոչված երկքաղաքացիները կօգտվեն սոցիալական ապահովության, կրթության և բժշկական օգնության իրավունքից՝ համաձայն այն երկրի օրենսդրության, որի տարածքում նրանք մշտապես բնակվում են։ Նույն սկզբունքը վերաբերում է զորակոչին։ Բացի այդ, նրանք, ովքեր, օրինակ, արդեն զինվորական ծառայություն են անցել Աբխազիայում, Ռուսաստանում այլևս չեն զորակոչվի։
Այսպես կոչված համաձայնագրի գործողության ժամկետը հինգ տարի է, և այն ինքնաբերաբար կերկարաձգվի, եթե կողմերից որևէ մեկը նախապես չծանուցի այն դադարեցնելու իր մտադրության մասին: Համաձայնագրից դուրս գալը չի հանգեցնի քաղաքացիության ավտոմատ դադարեցման:
