Ռուսական լայնածավալ միջամտությունը կասկածի տակ է դնում ընտրությունների արդյունքների լեգիտիմությունը. Նաուսեդա

Նա այսօր Բուդապեշտում, Եվրոպական խորհրդի ոչ պաշտոնական նիստից առաջ, պատասխանել է Վրաստանի խորհրդարանական ընտրություններին առնչվող հարցերին և ասել, որ հիասթափված է ոչ միայն ընտրությունների արդյունքներից, այլև ընտրությունների ընթացքում բացահայտված բազմաթիվ խախտումներից։

«Կարծում եմ՝ այս ժամանակը բավարար չէ մեր խորը մտահոգությունն արտահայտելու համար, քանի որ հիասթափված եմ ոչ միայն արդյունքից, այլև ընտրական գործընթացի բազմաթիվ խախտումներից։ Սա անհանգստացնող է։

Կա պատճառ, թե ինչու պետք է հետաքննենք այս ընտրական գործընթացը։ Ես չեմ հավատում, որ Վրաստանի կառույցները կարող են դա անել։ Շատ միամիտ կլինի սպասել, որ նրանք կարող են։ Կարծում եմ՝ մեզ անհրաժեշտ է միջազգային անկախ հետաքննություն այս գործընթացի վերաբերյալ:

Այս անգամ ընտրական գործընթացին Ռուսաստանի միջամտության մասշտաբն ու ինտենսիվությունն ավելի մեծ էր, քան երբևէ, և դա մտահոգիչ է։ Խոսքս միայն Վրաստանի մասին չէ, ես խոսում եմ Մոլդովայի մասին, բայց Մոլդովայում ընտրությունների արդյունքներն այլ էին»,- ասել է Լիտվայի նախագահը։

Հարցին, թե ինչպիսին կարող է լինել ԵՄ-ի պատասխանը, Գիտանաս Նաուսեդան ասել է, որ բավական է շատ հստակ ազդանշան ուղարկելը։

«Եթե դա անեք, ապա չեք կարող ակնկալել, որ կմոտենաք ԵՄ-ին: Դուք շարժվում եք հակառակ ուղղությամբ՝ հեռանալով ԵՄ-ից։ Ազդանշանը պետք է ընդունել, հասկանալ, և ես հույս ունեմ, որ Վրաստանը կկարողանա վերանայել իր ընթացքը։ Սակայն այս պահին ես մեծ հավանականություն չեմ տեսնում, որ դա տեղի կունենա մոտ ապագայում։

Իհարկե, այս անձը [Բիձինա Իվանիշվիլին] կանգնած է այս բոլոր գործընթացների ետևում, և մենք գիտենք, թե որքան խորն ու ինտենսիվ են նրա հարաբերությունները Ռուսաստանի Դաշնության հետ։ Սա է պատճառը, որ մենք խոսում ենք ոչ միայն Եվրամիությունից հեռանալու, այլ նաև Ռուսաստանի Դաշնության հետ մերձենալու մասին, քանի որ միջին ճանապարհ ընտրել չես կարող։ Եթե ​​որոշես ու աշխարհաքաղաքական քայլեր անես, չես կարող մեջտեղում լինել՝ գնում ես դեպի արևմո՞ւտք, թե՞ արևելք։ Դա պարզ է»,- ասել է Գիտանաս Նաուսեդան։