Ռուսաստանում այսպես կոչված օտարերկրյա գործակալներին արգելվել է մասնակցել ընտրություններին

Մասնավորապես, Ռուսաստանի այն քաղաքացիները, որոնք ընդգրկված են «օտարերկրյա գործակալների ցուցակում», կզրկվեն դաշնային, տարածաշրջանային և տեղական կառավարման մարմիններում ընտրվելու իրավունքից։ «Օտարերկրյա գործակալների հետ փոխկապակցված» քաղաքացիները պարտավոր են բոլոր քարոզչական նյութերում նշել այս կարգավիճակը:

Բացի այդ, «օտարերկրյա գործակալներին» արգելվում է լինել տեղամասային ընտրական հանձնաժողովի անդամ և ընտրություններին մասնակցել որպես դիտորդ։ Նրանք չեն կարող լինել թեկնածուների և ընտրական միավորումների լիազորված ներկայացուցիչներ:

Օրենքը նախատեսում է նաև պետական ​​մարմիններում աշխատող «օտարերկրյա գործակալների» լիազորությունների վաղաժամկետ դադարեցում, ինչը տեղի կունենա օրենքի ուժի մեջ մտնելուց 180 օր հետո։

«Մարդուն օտարերկրյա գործակալ ճանաչելու որոշում կայացնելու հիմքը դրսից գումար ստանալն է։ Կամ դուք լինելու եք ձեր երկրի քաղաքացիները, աշխատելու եք հանուն ձեր երկրի շահերի, կամ չեք կարողանա ներկայացնել բնակչությանը պետական ​​մարմիններում։ Արդեն օտարերկրյա գործակալ ճանաչված անձը չի կարող մասնակցել ընտրություններին, սակայն նա հնարավորություն ունի համապատասխան ընթացակարգի շրջանակներում ազատվել այդ կարգավիճակից, դադարեցնել իր գործունեության համար դրսից գումար ստանալը։

Մենք ամեն ինչ անում ենք մեր երկիրը պաշտպանելու համար, իսկ նրանք, ովքեր դրսից փող են ստանում և ցանկանում են ընտրվել պետական ​​մարմիններում, թող հրաժարվեն այդ գումարից և մտածեն, որ սխալ են անում»,- ասել է Պետդումայի խոսնակ Վյաչեսլավ Վոլոդինը։

Ըստ Настоящее Время-ի՝ օրենսդրական փոփոխություններն ընդունվել են այն ֆոնին, երբ «օտարերկրյա գործակալ» համարված ընդդիմադիր քաղաքական գործիչներն ու լրագրողները քարոզարշավ են սկսել Մոսկվայի քաղաքային դումայի ընտրություններում իրենց թեկնածությունը ներկայացնելու շուրջ։ Իսպանիայում բնակվող հեռուստահաղորդավարուհի Տատյանա Լազարևան, ԱՄՆ-ում բնակվող լրագրող Սերգեյ Մարկելովը և այլք ցանկություն են հայտնել մասնակցել ընտրություններին, որոնք պետք է կայանան 2024 թվականի սեպտեմբերին։

«Հաշվի առնելով, որ օտարերկրյա գործակալների ռեգիստրում ընդգրկված զգալի թվով անձինք ներկայում ապրում են արտերկրում, ունեն հակառուսական դիրքորոշումներ և աջակցում են, այդ թվում՝ ֆինանսապես, Ուկրաինայի զինված ուժերին, անհրաժեշտ է սահմանափակել ընտրական իրավունքը այս կատեգորիայի անձանց համար»,- ասել է «Արդար Ռուսաստան՝ հանուն արդարության» խմբակցության նախագահ և փոփոխությունների նախաձեռնող Սերգեյ Միրոնովը։

Օրենսդրական նախաձեռնությունը Դումային է ներկայացվել ապրիլի սկզբին և անմիջապես ընդունվել է։ Որպեսզի օրենքն ուժի մեջ մտնի, փոփոխությունները պետք է հաստատվեն Դաշնության խորհրդի և նախագահի կողմից։

«Օտարերկրյա գործակալների» մասին օրենքի առաջին տարբերակը Ռուսաստանում ընդունվել է 2012 թվականին, որը պատասխան էր 2011-2012 թթ. բողոքի ակցիաներին։ Օրենքը վերաբերում էր շահույթ չհետապնդող (ոչ կառավարական) կազմակերպություններին, որոնց ՌԴ ղեկավարությունը համարում էր գործիք, որի օգնությամբ, իբր, Արևմուտքը փորձում էր փոխել իշխանությունը Ռուսաստանում։ 2017 թվականից «օտարերկրյա գործակալների» օրենքը վերաբերել է նաև լրատվամիջոցներին։ Այսօր այս կարգավիճակը կարող է տրվել ցանկացած ֆիզիկական անձի (կամ ֆիզիկական անձանց միավորման), անկախ քաղաքացիությունից, իրավական ձևից և իրավասությունից, եթե նրանք մասնակցում են քաղաքական գործունեությանը Ռուսաստանում և ստանում են օտարերկրյա ֆինանսավորում: Օտարերկրյա աղբյուրից աջակցությունը կարող է դրսևորվել ոչ միայն դրամական ֆինանսավորման, այլ նաև կազմակերպչական, գիտամեթոդական, տեխնիկական և այլ տեսակի աջակցության հարցում։ Ներկայում Ռուսաստանում գործում է «գործակալների» չորս ռեգիստր՝ շահույթ չհետապնդող կազմակերպությունների, չգրանցված հասարակական միավորումների, լրատվամիջոցների և անհատների համար։ Ռեպրեսիվ օրենքը դարձել է քաղաքացիական հասարակությունը ոչնչացնելու Կրեմլի հիմնական զենքը։