Շամբան հերքում է, որ Օչամչիրեում նախատեսվում է ռուսական ռազմածովային բազա կառուցել

«Օչամչիրեում Ռուսաստանի Դաշնության ռազմածովային բազա չի նախատեսվում։ Կա սահմանային կետ, որտեղ տեղակայված են պարեկային նավակներ։ Մենք պատրաստ ենք իրադարձությունների ցանկացած զարգացման»,- ասել է Շամբան, ով այսպես կոչված ԱԳ նախարարի պաշտոնում նշանակվել է երկու օր առաջ։

ՏԱՍՍ-ին տված հարցազրույցում Շամբան նշել է, որ Սև ծովը կրկին դառնում է լարվածության տարածաշրջան, ավելի ու ավելի հաճախ են հայտնվում ՆԱՏՕ-ի նավերը, այնտեղ թռչում են ամերիկյան ու ՆԱՏՕ-ի հետախուզական ինքնաթիռներ։ «Մենք չենք կարող չանհանգստանալ այս ամենի համար։ Մեզ անհանգստացնում է նաև այն փաստը, որ Սև ծովի աքվատորիայում ռազմական գործողություններ են տեղի ունենում»,- ասել է Շամբան։

Նա նաև խոսել է Վրաստանում սպասվող խորհրդարանական ընտրությունների մասին և նշել, որ հայտնի չէ, թե ով կգա իշխանության։ «Եթե գան Սաակաշվիլիի կողմնակիցները՝ ներկայիս ընդդիմությունը, մենք չենք բացառում նրանց կողմից ինչ-որ արկածախնդրություն, բայց արդյունքը նրանց համար ողբալի կլինի։ Ոչ ոք չի ցանկանում նոր պատերազմ սկսել, դա նշանակում է նոր զոհեր։ Ամեն դեպքում, դա մեզ պետք չէ»,- ասել է Շամբան։

Սերգեյ Շամբան РИА Новости-ին տված հարցազրույցում նույնպես հերքել է Օչամչիրեի նավահանգստում ռուսական բազայի կառուցումը։ Նրա խոսքով՝ Ռուսաստանի և Աբխազիայի միջև կա «բազմակողմ միջպետական ​​համագործակցություն», որի կարևորագույն մասերից է համագործակցությունն անվտանգության ոլորտում։ «Ռուսական 7-րդ ռազմաբազան գտնվում է հանրապետությունում, ռուսական սահմանապահ զորքերը շատ կարևոր դեր են խաղում Աբխազիայում անվտանգության ապահովման գործում, հատկապես հաշվի առնելով, որ Վրաստանը հրաժարվում է ուժի չկիրառման մասին իրավաբանորեն պարտավորեցնող փաստաթուղթ ստորագրելուց»,- ասել է դե ֆակտո արտգործնախարարը։

2023 թվականի հոկտեմբերի 5-ին օկուպացված տարածաշրջանի դե ֆակտո նախագահ Ասլան Բժանիան ռուսական «Իզվեստիա» թերթին տված հարցազրույցում ասել է, որ Ռուսաստանն ու Աբխազիան համաձայնագիր են ստորագրել, և «մոտ ապագայում, Օչամչիրեի շրջանում կլինի Ռուսաստանի Դաշնության ռազմական և ռազմածովային նավատորմի մշտական ​​բազա»:

Օրեր առաջ Վրաստանի նախագահ Սալոմե Զուրաբիշվիլին ասել էր, որ Օչամչիրեի բազայում նախնական աշխատանքներ են ընթանում, ինչը շատ լուրջ խնդիր է ոչ միայն Վրաստանի համար։ «Սա ամբողջ Սև ծովի անվտանգության խնդիրն է, այս շերտի համար, և եթե մենք լինեինք այլ պայմաններում, եթե այս իշխանությունն իսկապես հայրենասեր լիներ և պաշտպաներ ազգային շահերը, մենք պետք է լինեինք ՆԱՏՕ-ի գագաթնաժողովի շրջանակներում, ինչ-որ հանդիպման, որը կհավաքվեր Սև ծովի և Սև ծովի անվտանգության հարցերի շուրջ, որտեղ մենք մեր տեղն ունենք։ Եթե ​​մեզնով այսօր հետաքրքրվում է Արևմուտքը, մեզնով հետաքրքրվում է ոչ միայն Կովկասի, այլև Սև ծովի պատճառով։ Սա մեր հաղթաթուղթն է և նաև մեր թուլությունը, եթե մենք չարձագանքենք»,- ասել է նախագահը։