Շնորհակալ եմ Բիձինա Իվանիշվիլիին, ուրախ եմ, որ պետք է նրա հետ պաշտպանեմ երկիրը. Կավելաշվիլի

«Առաջին հերթին ես կսկսեմ ձեզ շնորհակալություն հայտնելով։ Հատուկ շնորհակալություն պարոն Բիձինա Իվանիշվիլիին՝ մեզ համար արժանապատիվ և ակնառու մարդուն։ Ես միշտ նշել եմ, որ հպարտ և ուրախ եմ, որ այս մարդու հետ նման դժվարին ու ծանր ժամանակաշրջանում պաշտպանում եմ մեր երկիրը, և շատ շնորհակալ եմ, այսպես ասած, ինձ այս վստահությունը տալու համար։ Շնորհակալ եմ նաև իմ ընկերներին, մեծամասնությանը, մեծամասնության յուրաքանչյուր անդամի այս վստահությունը հայտնելու համար։

Իհարկե, ես գիտակցում եմ Վրաստանի նախագահի պաշտոնի մեծ պատասխանատվությունը, հատկապես այն հանգամանքի ֆոնին, որ, ցավոք, ներկայիս նախագահը ուղղակիորեն վիրավորել և անտեսել է մեր հիմնական փաստաթուղթը՝ Վրաստանի Սահմանադրությունը և այսօր էլ շարունակում է խախտել այն։

Սա այն ֆոնին, որ հենց սրանից է հակադրվում մեր հասարակությունը, հրահրվում է արմատականացում, բևեռացում։ Հատկապես հաշվի առնելով այն հանգամանքը, որ մեր անբարյացակամ ընկերները, չակերտներով, օգնում են այս գործընթացի ակտիվացմանը։ Ուստի հիմնական նպատակներից ու առաքելություններից մեկը լինելու է նախագահի ինստիտուտը սահմանադրական դաշտ վերադարձնելը։

Մենք ունենք շատ առողջ սահմանադրություն և նախագահի շատ պատասխանատու ինստիտուտ, և ամենակարևորն այն է, որ Վրաստանի նախագահը պետք է լինի անկուսակցական, հասարակությանը միավորող։

Վրաստանում վրացիներին պետք չէ սովորեցնել, որ ատելությունն իսկապես բաժանում և հակադրում է մարդկանց։ Ի հակադրություն, սերը միավորում է: Անկեղծ ուզում եմ ձեզ ասել և խոստանամ, իսկապես սիրում եմ, անչափ սիրում եմ իմ հայրենիքն ու իմ երկիրը և

ամեն ինչ անելու եմ վրաց հասարակությանը, մեր ազգային շահերը, մեր ինքնությունը, մեր արժեքները համախմբելու, հասարակությանը Վրաստանի անկախության գաղափարի շուրջ համախմբելու համար։

Համոզված եմ, որ հասարակությունը մեզ կաջակցի, և մենք ավելի ուժեղ կդարձնենք մեր հայրենիքը, մեր Վրաստանը։ Աստված մեզ պահապան լինի, Տերը պահապան լինի մեր երկրին։ Շատ շնորհակալ եմ ուշադրության համար և լավ եղեք»,- ասել է Կավելաշվիլին։

Միխեիլ Կավելաշվիլին նախկին ֆուտբոլիստ է, երկու գումարման խորհրդարանի պատգամավոր և հակաարևմտյան ուղերձներով աչքի ընկնող «Ժողովրդի ուժի» առաջնորդներից։ 2016 թվականին «Վրացական երազանքից» Կավելաշվիլին ընտրվել է Սանզոնայի մեծամասնական պատգամավոր, իսկ 2020 թվականի գումարման խորհրդարանում նա եղել է Նաձալադևիի մեծամասնական պատգամավոր։ 2024 թվականի ընտրությունների համար նա, ինչպես և «Ժողովրդի ուժի» մյուս անդամները, ընդգրկված էր «Վրացական երազանքի» կուսակցության ցուցակում։ Նոյեմբերի 25-ին, «Վրացական երազանքի» կողմից 11-րդ գումարման խորհրդարանի նիստին Միխեիլ Կավելաշվիլին ճանաչվեց ոչ լեգիտիմ խորհրդարանի պատգամավոր։

53-ամյա Միխեիլ Կավելաշվիլին Վրաստանի հավաքականի նախկին հարձակվող է։ 1988-1995 թվականներին եղել է «Դինամո Թբիլիսիի» ֆուտբոլիստ։ Տարբեր տարիներին նա խաղացել է այնպիսի ֆուտբոլային ակումբներում, ինչպիսիք են «Մանչեսթեր Սիթին», «Գրասհոֆերը», «Ցյուրիխը», «Լյուցեռնը»։ 2015-ին Միխեիլ Կավելաշվիլին ցանկանում էր դառնալ Ֆուտբոլի ֆեդերացիայի նախագահ, և ինչպես ինքն է ասել, պատրաստվում էր դատարանում բողոքարկել ֆեդերացիայի կանոնադրության արձանագրությունը, ըստ որի՝ նախագահի թեկնածուն պետք է բարձրագույն կրթություն ունենա։ Մինչ օրս, չկա հրապարակված փաստաթուղթ (նույնիսկ խորհրդարանի կայքում), որը կհաստատի Կավելաշվիլիի բարձրագույն կրթությունը։