Շոլցի խոսքով՝ Խանգոշվիլիին սպանողին Ռուսաստանին հանձնելը հեշտ որոշում չի եղել

«Այս դժվար որոշումն ընդունվել է համապատասխան գերատեսչությունների և իշխող կոալիցիայի միջև մանրազնին խորհրդակցությունից և քննարկումից հետո: Այն իրականացվել է բանտարկության պատիժը կրելուց հրաժարվելու և հետագա արտաքսման մասին գլխավոր դատախազի հրամանի հիման վրա»,- ասել է Շոլցը։

Կանցլերն ընդգծել է, որ Կրեմլի հետ նման համաձայնությունը անհրաժեշտ է Ռուսաստանի Դաշնության բանտերում գտնվող ռուս քաղբանտարկյալների, Գերմանիայի և ԱՄՆ քաղաքացիների ազատ արձակման համար։

«Մի քանի տարի բանտում անցկացրած ցմահ ազատազրկմամբ մարդասպանին արտաքսելու որոշումը ոչ մեկի համար հեշտ չէր։

Պետության շահագրգռվածությունը ազատազրկման իրականացման հարցում պետք է համահունչ լինի Ռուսաստանում բանտարկված անմեղ մարդկանց և անօրինական քաղբանտարկյալների ազատությանը, նրանց առողջությանը և որոշ դեպքերում կյանքին», - ասել է Շոլցը։

Օլաֆ Շոլցը հաստատել է, որ գործարքի շրջանակներում ազատվել է Գերմանիայի քաղաքացի Ռիկո Կրիգերը, ով Բելառուսում մահապատժի էր դատապարտվել ահաբեկչության համար, իսկ ավելի ուշ երկրի նախագահ Ալեքսանդր Լուկաշենկոյի կողմից նրան ներում էր շնորհվել։ Քյոլնի օդանավակայանում Գերմանիայի կանցլերը անձամբ է դիմավորել Կրիգերին և մի քանի ռուս քաղբանտարկյալների։

Գերիների փոխանակմանն արձագանքել է Գերմանիայի խորհրդարանի արտաքին հարաբերությունների հանձնաժողովի ղեկավար Մայքլ Ռոթը, ով ասել է, որ «երբեմն մարդասիրական նպատակներով պետք է պայմանավորվել սատանայի հետ»։

Գերիների փոխանակման շրջանակներում Ռուսաստանն ազատ է արձակել 16 մարդու, իսկ դրա դիմաց ստացել 8-ին։ Ինչպես գրում է BBC-ի ռուսական ծառայությունը, Ռուսաստանը սառը պատերազմի ավարտից հետո առաջին անգամ ազատ է արձակել քաղբանտարկյալների՝ իր հատուկ ծառայությունների աշխատակիցների դիմաց։

Վադիմ Կրասիկովի ազատ արձակմամբ անձամբ հետաքրքրված էր ՌԴ նախագահ Վլադիմիր Պուտինը։

Մոսկվա վերադարձածներին Պուտինը դիմավորել է օդանավակայանում՝ կարմիր գորգով ու պատվո պահակախմբով։ Առաջին մարդը, ում ձեռքը նա սեղմել և գրկախառնվել է, եղել է Վադիմ Կրասիկովը։

Կրասիկովը Գերմանիայում ցմահ ազատազրկման էր դատապարտվել 2021 թվականի դեկտեմբերից։ 2019 թվականի օգոստոսի 23-ին օրը ցերեկով Բեռլինի զբոսայգում նա երկու կրակոցով սպանել է չեչեն նախկին դաշտային հրամանատար, 40-ամյա Զելիմխան Խանգոշվիլիին։ Պուտինը Կրասիկովին անվանել է «հայրենասեր, որը լիկվիդացրել է ավազակին»։