Լրահոս

Նիստին մի քանի տասնյակ մարդիկ բողոքի ակցիա են անցկացրել և ասել, որ չեն համաձայնի լքել իրենց տները նույնիսկ փոխհատուցման դիմաց։

Ջանսուխ Նանբան նշում է, որ ապատեղեկատվություն է տարածվում բնակչության տեղահանման հետ կապված, սակայն չի հերքում, որ օդանավակայանի ընդլայնում իսկապես նախատեսվում է։

«Հանդիպման նպատակն էր գյուղի [Բաբուշարա] բնակիչներին տեղեկացնել օդանավակայանի և դրա ենթակառուցվածքների վերակառուցման և զարգացման ծրագրերի մասին։ Ժողովրդին ներկայացրինք թե հիմա ինչ փուլում են վերանորոգման աշխատանքները, ինչպես է վերականգնվում թռիչքուղին, ապամոնտաժվում՝ ոչ պիտանի շինությունները։

Քննարկեցինք նաև օդանավակայանի երկարաժամկետ զարգացման ծրագիրը, այն է՝ երկրորդ փուլը, որը նախատեսում է ընդլայնում՝ օդանավակայանի տարածքի հարավային հատվածում։ Ժամանակակից օդանավակայան կառուցելու համար, որը կհամապատասխանի միջազգային բոլոր պահանջներին, գոյություն ունեցող տարածքը բավարար չէ, և այս առումով քննարկվում է երկարաժամկետ զարգացման պլանը՝ այսպես կոչված երկրորդ փուլը։

Կարևոր համարեցինք այս հարցի քննարկմանը ընդգրկել գյուղի ներկայացուցիչներին»,- ասել է Նանբան։

Դե ֆակտո նախարարի խոսքով՝ հանդիպման արդյունքում պայմանավորվածություն է ձեռք բերվել, որ փոխնախագահ Բադրի Գյունբայի ղեկավարությամբ համակարգող շտաբի աշխատանքներին կներգրավվի գյուղացիների 5-6 հոգանոց խումբ՝ օդանավակայանի հարավային հատվածում ապրող մարդկանց շահերը հաշվի առնելու համար։

«Վլադիսլավ Արձինբայի անվան Սոխումիի միջազգային օդանավակայանի» վերականգնման մասին Ռուսաստանի և դե ֆակտո Աբխազիայի կառավարությունների միջև այսպես կոչված համաձայնագիրը ստորագրվել է 2023 թվականի հունիսին։

Օդանավակայանը կվերականգնի Ռուսաստանի ներքին գործերի նախկին նախարար, ներկայում Անվտանգության խորհրդի քարտուղարի առաջին տեղակալ Ռաշիդ Նուրգալիևի որդու՝ Ռաշիդ Նուրգալիևի (կրտսեր) ընկերությունը՝ «Ենթակառուցվածքային զարգացում» ՍՊԸ-ն։ Ընկերությունը ստեղծվել է 2023 թվականի հուլիսի 10-ին և գրանցված է Մոսկվայում։

Աբխազիայի դե ֆակտո կառավարությունը օդանավակայանը ներդրողին է հանձնել 49 տարի ժամկետով։ Պետություն-մասնավոր համագործակցության պայմանագրի համաձայն՝ ներդրողը կվերանորոգի 3100 մ երկարությամբ և 45 մետր լայնությամբ թռիչքուղին, որից հետո հնարավոր կլինի «ընդունել ժամանակակից ռուսական և արտասահմանյան արտադրության ինքնաթիռներ»։ Նախատեսվում է նաև կառուցել նոր մարդատար տերմինալ և վերանորոգել օդանավակայանի պատմական շենքը։

Նախատեսվում է օդանավակայանը շահագործման հանձնել 2024 թվականի դեկտեմբերին։