Տեսնենք, թե Սալոմե Զուրաբիշվիլին որտեղ կշարունակի իր կյանքը՝ ճաղերի ետևո՞ւմ, թե՞ դրսում․ Կոբախիձե

Այսօրվա ճեպազրույցում Կոբախիձեն ասել է, որ նախագահի կողմից նոր խորհրդարանական ընտրություններ նշանակելու մասին հայտարարությունը, ինչպես նաև դեկտեմբերի 29-ից հետո Օրբելյանների պալատում մնալը քրեական հանցագործություն կլինի։

«Սալոմե Զուրաբիշվիլիի պաշտոնավարման համար մեկ շաբաթ էլ չի մնացել։ Այս մեկ շաբաթվա ընթացքում նա ոչինչ չի կարողանա անել։ Չնայած որոշ եվրոպացի քաղաքական գործիչներ և պաշտոնյաներ ասում են, որ շատ բան կարող է տեղի ունենալ մինչև դեկտեմբերի 29-ը, ես ձեզ վստահեցնում եմ, որ մինչև դեկտեմբերի 29-ը առանձնապես բան չի լինի»,- ասել է Կոբախիձեն։

Նրա խոսքով, Վրաստանում «արմատական ​​ընդդիմությունը» չի հաղթի, և Սալոմե Զուրաբիշվիլին դեկտեմբերի 29-ին ստիպված կլինի թողնել իր պաշտոնը։

«Տեսնենք, թե նա որտեղ կշարունակի իր կյանքը՝ ճաղերի ետևո՞ւմ, թե՞ ճաղերից դուրս։ Կարծում եմ՝ նա ունի խելամտություն՝ չխախտելու քրեական օրենսգրքի նորմերը։

Կրկնեմ, որ 72-ամյա կնոջը կարող է ոչ ոք չուզենա բանտ նստեցնել, բայց դրանով նա դատապարտելու է բոլոր այն մարդկանց, ովքեր նման սցենարով իր հետ կլինեն նախագահական նստավայրում։ Եվս մեկ անգամ կասեմ, որ ես այլ սցենար եմ ենթադրում, կարծում եմ, որ նա դեռ ունի խելամտություն, որպեսզի չխախտի քրեական օրենսգիրքը, թույլ չտա, որ որևէ մեկը խախտի այնպիսի նորմեր, որոնք կառաջացնեն նրանց երկարաժամկետ ազատազրկումը»։ ասել է Կոբախիձեն։

Դեկտեմբերի 21-ին Սալոմե Զուրաբիշվիլին հանդիպել է ընդդիմադիր կուսակցությունների և քաղաքացիական հասարակության ներկայացուցիչների հետ, որից հետո հայտարարել է, որ իրենք մշակել են «հարձակման ռազմավարություն»։ Նախագահի խոսքով՝ նոր ընտրություններ նշանակելու համար հիմք է հանդիսանում ԵԱՀԿ/ԺՀՄԻԳ-ի վերջնական զեկույցը, և պետք է գործադրել «բոլոր ճնշումները», որպեսզի «Վրացական երազանքի» պատվավոր նախագահ Բիձինա Իվանիշվիլին կայացնի այս որոշումը։