«Վրացական երազանքը» համաներման մասին օրինագիծ է նախաձեռնել

Նախագծով նախատեսվում է նաև պատժի նվազեցում ½ և ¼-ով, պատասխանատվությունից և պատժից լրիվ ազատում։

«Համաներումը հատուկ մոտեցում է ներդնում դատապարտվածների նկատմամբ, և մեկ տարով պայմանական պատժաչափերի կրճատումը կվերաբերի մոտավորապես 7000 անձի, ինչը նորություն է համաներման նախորդ նախագծերի համեմատ», - ասել է Իոնաթամիշվիլին:

Համաներումը չի վերաբերի սպանության համար դատապարտված անձանց, թմրավաճառներին, սեռական հանցագործություններին, կողոպուտին, ահաբեկչությանը, կոռուպցիային և պաշտոնեական հանցագործություններին, այսպես կոչված գողական աշխարհին, կոնվենցիոն հանցագործություններին, թրաֆիքինգին, այլ ծանր և առանձնապես ծանր հանցագործություններին։

«Վրացական երազանքը» հուլիսին խորհրդարանի արտահերթ նիստում առաջին ընթերցմամբ կընդունի համաներման օրենքը, իսկ սեպտեմբերին վերջնական կհաստատի։

Համաներման մասին հունիսի 28-ին խորհրդարանում ունեցած ելույթի ժամանակ հայտարարել է վարչապետ Իրակլի Կոբախիձեն։ Նրա խոսքով՝ քրեակատարողական հիմնարկներում այսօր կա մոտ 10 հազար բանտարկյալ, ինչը «օպտիմալ տվյալ չէ»։ «Ցանկալի կլիներ, որ բանտարկյալների թիվը կրճատվեր առնվազն 1/3-ով, և կարծում ենք, որ համաներման մասին օրենքը, որը պատրաստվել է, լուրջ ներդրում կունենա այս նպատակին հասնելու գործում»,- ասել է նա։

«Վրացական երազանքը» համաներում է հայտարարում խորհրդարանական ընտրություններից առաջ։ «Գախարիան հանուն Վրաստանի» կուսակցությունը հանդես է եկել նախաձեռնությամբ՝ այն կիրառելու բոլոր այն անձանց նկատմամբ, ովքեր ձերբակալվել և տուգանվել են ռուսական օրենքի դեմ բողոքելու համար։