«Վրացական երազանքի» կառավարությունը Էստոնիայի և Լիտվայի պատժամիջոցներին «համապատասխան միջոցներով» չի պատասխանի

«Վրացական իշխանություններն իրավունք և հնարավորություն ունեն համապատասխան միջոցներով պատասխանել Լիտվայի և Էստոնիայի կառավարությունների հակավրացական որոշմանը։ Սակայն, ելնելով լիտվացի և էստոնացի ժողովուրդների նկատմամբ հարգանքից, մենք նպատակահարմար չենք գտնում նման քայլի դիմելը։ Մեր որոշումն է մնալ միակողմանի բարեկամության ռեժիմում երկու պետությունների հետ՝ չվտանգելու համար վրացի, էստոնացի և լիտվացի ժողովուրդների ավանդական բարեկամությունը»,- ասված է կառավարության մամուլի ծառայության հաղորդագրության մեջ։

Հայտարարության մեջ կարդում ենք, որ Էստոնիան և Լիտվան «այսօր ամենասահմանափակ ինքնիշխանությունն ունեն ԵՄ-ում», և նրանց կառավարությունները «գործում են ոչ թե իրենց սեփական ժողովրդի շահերին համապատասխան, այլ օտարերկրյա վարչակազմերի թելադրանքով»։

«Սա է հիմնական պատճառը, որ նշված պետությունների կառավարությունները ստիպված են գործել իրենց արժանապատվության դեմ։ Ափսոս, որ չնայած անկախության 33-ամյա պատմությանը, Լիտվայի և Էստոնիայի իշխանությունները չեն կարողացել ձերբազատվել խորհրդային մտածելակերպից։

Մեր բարեկամ էստոնացի և լիտվացի ժողովուրդներին մաղթում ենք ինքնիշխանության ամրապնդում և ամենայն բարիք 2025 թվականին»,- հայտարարում է Վրաստանի ոչ լեգիտիմ կառավարությունը։

Դեկտեմբերի 2-ին Էստոնիան և Լիտվան վիզային սահմանափակումներ են մտցրել «Վրացական երազանքի» պատվավոր նախագահ Բիձինա Իվանիշվիլիի, ՆԳ նախարար Վախթանգ Գոմելաուրիի և ՆԳՆ 9 այլ բարձրաստիճան պաշտոնյաների համար։ Դեկտեմբերի 15-ին երկրներն ընդլայնել են պատժամիջոցների ենթարկված անձանց ցուցակը․ Էստոնիան արգելել է Վրաստանի ևս 14 բարձրաստիճան պաշտոնյաների մուտքը իր տարածք, իսկ Լիտվան՝ 17 պաշտոնյայի։ Նրանց թվում է Իրակլի Կոբախիձեն։

«Ես կոչ եմ անում ԵՄ բոլոր երկրներին արձագանքել այն ամենին, ինչ տեղի է ունենում Վրաստանում և կոնկրետ միջոցներ ձեռնարկել նրանց դեմ, ովքեր անհիմն ուժ և դաժան բռնություն են կիրառում Վրաստանի ժողովրդի նկատմամբ և խարխլում ժողովրդավարությունը», - ասել է Էստոնիայի արտգործնախարար Մարգուս Ցահկնան։

Լիտվայի արտաքին գործերի նախարարությունը հրապարակել է լրացուցիչ պատժամիջոցների ենթարկված 17 անձանց ցուցակը։ Նրանում, Իրակլի Կոբախիձեից բացի, ընդգրկվել են Պետական ​​անվտանգության ծառայության ղեկավար Գրիգոլ Լիլուաշվիլին, «Վրացական երազանքի» գլխավոր քարտուղար և Թբիլիսիի քաղաքապետ Կախա Կալաձեն, Թբիլիսիի վերաքննիչ դատարանի նախագահ Միխեիլ Չինչալաձեն, «Վրացական երազանքի» գործադիր քարտուղար Մամուկա Մդինարաձեն և կառավարական քարոզչական «Իմեդի» հեռուստաընկերության սեփականատեր Իրակլի Ռուխաձեն։