Վրաստանը, Իրաքի և Չինաստանի հետ միասին, ռուսական ալյուրի ամենամեծ ներկրողն է

Հունվար-հոկտեմբեր ամիսներին Ռուսաստանն արտահանել է 990 հազար տոննա ցորենի և ցորենի տարեկանի ալյուր, ինչը գերազանցում է ամբողջ 2022 թվականի արտահանման ծավալը։

«Ալյուրի ամենախոշոր գնորդը դարձել է Իրաքը, որն անցած տարեվերջին երկրորդ տեղում էր։ Հունվար-հոկտեմբեր ամիսներին այս երկիր է ուղարկվել ավելի քան 150 հազար տոննա ռուսական ալյուր, ինչը 17 տոկոսով ավելի է 2022 թվականի 10 ամսվա մատակարարումից։ Երկրորդ տեղը զբաղեցրել է Վրաստանը, որտեղ արտահանվել է 126 հազար տոննա։ Լավագույն եռյակ է մտել նաև Չինաստանը, որը 3․7 անգամ ավելացրել է ռուսական ալյուրի գնումները և այն կազմել ավելի քան 100 հազար տոննա։ 2022 թվականին Չինաստան է արտահանվել 37 հազար տոննա ալյուր, 2021 թվականին՝ 13 հազար տոննայից պակաս»,- գրում է «Ինտերֆաքս»-ը։

Վրաստանի Վիճակագրության ազգային ծառայության տվյալների համաձայն՝ 2023 թվականի հունվար-հոկտեմբեր ամիսներին Վրաստան է ներկրվել 33 848 750 ԱՄՆ դոլարի ցորենի կամ ցորենի տարեկանի ալյուր։ Դրանից 32 554 860 դոլարը բաժին է ընկնում ռուսական ալյուրին։ Նախորդ տարվա համեմատ ներմուծումը նվազել է՝ 2022 թվականի 10 ամսում Վրաստան ներկրված ռուսական ցորենի կամ ցորենի տարեկանի ալյուրի արժեքը կազմել է 54 503 170 դոլար։ 2022 թվականին Վրաստանը ռուսական ալյուրի խոշորագույն ներկրողն էր։