Այսպես կոչված «օտարերկրյա գործակալների» մասին ռուսական օրենքը Վրաստանի՝ Եվրամիությանն ինտեգրվելու համար խոչընդոտ է հանդիսանում։ Այս մասին հայտարարել է Վրաստանում Էստոնիայի դեսպան Ռիինա Կալիուրանդը։
Լրահոս
Ընթերցողի ընտրանի
- 1 Ես կտրականապես դեմ էի առանց վիզայի ռեժիմի կասեցմանը, բայց փոխեցի իմ դիրքորոշումը․ Ռոթ
- 2 Մառնեուլիի սակրեբուլոյի փոխնախագահը մի քանի քվեաթերթիկ է լցրել արկղի մեջ, ընտրատեղամասը փակվել է
- 3 ԿԸՀ-ի նախնական արդյունքներով՝ ընտրություններում 53%-ով առաջատարը «Վրացական երազանքն» է
- 4 «Ֆորմուլայի» և «Մթավարիի» էքզիթ փոլերով ընտրություններում հաղթում է ընդդիմությունը, ըստ «Իմեդիի»՝ «Երազանքը»
- 5 Նախագահը չի ճանաչում ընտրությունների արդյունքները. հոկտեմբերի 28-ին Ռուսթավելիում հավաք է նախատեսվում
- 6 Ժամը 17:00-ի դրությամբ ընտրողների մասնակցությունը 50,06 տոկոս է
«Երբ այս օրենքը հայտնվեց խորհրդարանում մեկ տարի առաջ, մենք հասկացանք, որ կլինեն հետևանքներ, քանի որ այս օրենքը չի համապատասխանում ԵՄ չափանիշներին, մեր արժեքներին և ժողովրդավարական հասարակությանը, քանի որ այն դեմոնիզացնում և խարանում է հասարակության շատ մեծ մասին։ Դրա համար մենք նաև զգուշացրել ենք, որ երբ խոսքը վերաբերում է ՀԿ-ների ֆինանսավորմանը, կան այլ միջոցներ, որոնք կարելի է օգտագործել։ Մեկ տարի առաջ այս օրենքը ետ է կանչվել։ Ցավոք սրտի, չնայած այն նորից օրակարգ չբերելու խոստմանը, նրանք արեցին դա: Մեր ուղերձը շատ պարզ էր, որ եթե այս օրենքն ընդունվի, մենք չենք կարողանա շարունակել մեր սովորական գործունեությունը Վրաստանի հետ, քանի որ սա միտումնավոր քայլ է այն ամենի դեմ, ինչ մենք ձեզ խորհուրդ ենք տվել անել»,- ասել է Կալիուրանդը «Ինտերպրեսնյուզին»։
Դիվանագետի խոսքով՝ խնդիրը միայն ռուսական օրենքի մեջ չէ, կան այլ օրենքներ, որոնք նույնպես հակասում են Եվրամիության արժեքային համակարգին։
«Վրաստանը կարող է շատ երկար մնալ Եվրամիության սպասասրահում։ Կարծում եմ՝ մենք արեցինք այն ամենը, ինչ կարող էինք: Մենք բոլոր փաստարկները ներկայացրել ենք Վրաստանի կառավարությանը և խորհրդարանին, թեև նրանք ասում են, որ լեգիտիմ փաստարկներ չեն լսել։ Կարծում եմ՝ մենք բազմաթիվ փաստարկներ ենք բերել։ Մենք նրանց տվեցինք նաև նկարագրություններ, թե ինչպես ենք մենք՝ այլ հասարակությունները, վերաբերվում այս խնդիրներին:
Օրինակ՝ Էստոնիայում նույնպես կան բազմաթիվ հասարակական կազմակերպություններ։ Շատ հասարակական կազմակերպություններ ֆինանսավորվում են այլ երկրներից, ԵՄ երկրներից։ Մենք չենք վախենում, որ դրանք կխաթարեն մեր ժողովրդավարությունը։
Քաղաքացիական հասարակության դերը կառավարության և խորհրդարանի գործունեության նկատմամբ քննադատությունն ու կարևորագույն խնդիրներ բարձրացնելն է: Եթե դուք համախմբված և ուժեղ ժողովրդավարություն եք և ունեք արդար ընտրված կառավարություն և խորհրդարան, ապա չպետք է անհանգստանաք, որ քաղաքացիական հասարակությունը որևէ կերպ կխաթարի ձեր լեգիտիմությունը: Երկու կողմից էլ կարող են կոշտ խոսակցություններ լինել, բայց դա պետք է հաղթահարել ռեպրեսիվ միջոցներից բացի այլ միջոցներով։ Պատժի մասին խոսք չպետք է լինի։ Չպետք է խարանել, քանի որ դա այն է, ինչ մենք տեսնում ենք այստեղ»,- ասել է դեսպանը։
Ռիինա Կալիուրանդիի խոսքով՝ Վրաստանի իշխանություններն ասում են, որ մոտենում են Եվրամիությանը, սակայն նրանց գործողությունները դա չեն հաստատում։
«Չի կարելի գալ ու ասել՝ ես ուզում եմ ակումբի անդամ դառնալ, բայց ես ունեմ իմ կանոնները։ Այդպես չի ստացվում: Ցավոք, որոշ իրադարձություններ կարող են բավականին ցավոտ լինել նաև հանրության համար։ Ոչ ոք չի ցանկանում պատժել հասարակությանը, բայց մենք պետք է ցույց տանք, որ դա խաղի կանոնները չպահպանելու արդյունք է։ Վրացի ժողովուրդը, որը ձգտում է անդամակցել Եվրամիությանը, կազմում է բնակչության 85%-ը, Վրաստանի կառավարությունը պարտավոր է կատարել այդ մարդկանց ցանկությունները և խաղալ կանոններով։
ԵՄ-ն կանոնների հավաքածու է, ապրելակերպ, ոչ թե բարեգործական կազմակերպություն: Եթե այս ապրելակերպը և այս արժեքները որևէ պատճառով անընդունելի են, ԵՄ-ն նույնպես իրավունք ունի փոխել այս արտոնյալ հարաբերությունները։
Մարդկանց հետ սա կապ չունի, թեև մարդիկ տուժելու են։ Բայց հետո, ի վերջո, մարդիկ ընտրության հնարավորություն կունենան։ Ընտրություններ են մոտենում, և դա վրաց ժողովրդի գործն է։ Վիզայի ազատության կասեցումը երբեք չպետք է իրականացվի, բայց դա իրական գործիք է»,- ասել է Էստոնիայի դեսպանը։
Օրերս Էստոնիայի խորհրդարանն ընդունել է «Վրաստանում ժողովրդավարության ճգնաժամի մասին» հայտարարություն, ըստ որի, քանի դեռ «Օտարերկրյա ազդեցության թափանցիկության մասին» օրենքը չեղյալ չի հայտարարվել, Էստոնիան պետք է արգելափակի Եվրամիությանը Վրաստանի անդամակցության հետագա բոլոր գործընթացները։ Ռիյգիկոգուն կարծում է, որ Էստոնիան պետք է աջակցի Վրաստանի համար վիզային ռեժիմի ազատականացման կասեցմանը։ Հայտարարության մեջ նշվում է նաև, որ Էստոնիան պետք է Եվրամիության խորհրդին առաջարկի պատժամիջոցներ կիրառել «Վրացական երազանքի» պատվավոր նախագահ Բիձինա Իվանիշվիլիի, կառավարության անդամների, Վրաստանի խորհրդարանի ղեկավարների և «Վրացական երազանք» կուսակցության ղեկավարների, ինչպես նաև իշխող կուսակցության խորհրդարանական խմբակցության անդամների դեմ։ Պատժամիջոցները նշանակում են նաև արգելել նրանց մուտքը Եվրամիություն։ Եթե այս առաջարկը աջակցություն չստանա Եվրոպական միության խորհրդում, խորհրդարանը ցանկանում է, որ Էստոնիան պատժամիջոցներ սահմանի վերը թվարկված անձանց նկատմամբ, այդ թվում՝ արգելելով նրանց մուտքը Էստոնիա:
