Վրաստանի 6 քաղաքացիներն ազատ են արձակվել Ցխինվալիի մեկուսարանից

Այսպես կոչված Հարավային Օսիայի Պետանվտանգության կոմիտեի տվյալներով՝ Գորիի մունիցիպալիտետի Ախրիսի գյուղի բնակիչներ Պաատա Բեբնաձեն, Բեքա Բեգիաշվիլին, Մամուկա Գելիաշվիլին, Տարիել Կուժոշվիլին և Գոգա Ուզնաձեն ոչ սթափ վիճակում դիտավորյալ հատել են «պետական ​​սահմանը»։

«Հարավային Օսիայի սահմանային իշխանությունների աշխատակիցները հուլիսի 6-ին Ցխինվալիի շրջանի Ղրոմ բնակավայրի շրջակայքում ձերբակալել են օրինախախտների։ Երկուշաբթի՝ հուլիսի 10-ին, Հարավային Օսիայի Հանրապետության «Պետական ​​սահմանի մասին» օրենքի համաձայն, նրանք վտարվել են Հանրապետությունից»,- ասվում է դե ֆակտո իշխանության հայտարարության մեջ։

Վրաստանի քաղաքացիների հերթական անօրինական ձերբակալության մասին հայտնի դարձավ հուլիսի 7-ին, երբ այդ մասին խորհրդարանում հայտարարեց Պետական ​​անվտանգության ծառայության ղեկավարի առաջին տեղակալ Ալեքսի Բատիաշվիլին։

«Ուզում եմ ձեզ մի ցավալի փաստ հայտնել, որ այսօր առավոտյան օկուպացիոն ուժերի կողմից ապօրինի ձերբակալվել են մեր ևս վեց համաքաղաքացիներ։ Ակտիվացված է թեժ գիծը, ​​ներգրավված են մեր միջազգային գործընկերները։ Նրանց ձերբակալությունը հաստատվել է, և մենք սպասում ենք հետագա զարգացումներին։ Մենք կանենք ամեն ինչ, որպեսզի այդ մարդկանց հնարավորինս շուտ վերադարձնենք իրենց ընտանիքներ»,- ասել է Բատիաշվիլին համատեղ կոմիտեների նիստում։

Ըստ ՊԱԾ-ի՝ կենտրոնական կառավարությունը միջազգային գործընկերների հետ միասին շարունակում է ակտիվորեն աշխատել օկուպացված տարածքներում անօրինական բանտարկված Վրաստանի բոլոր քաղաքացիներին ազատ արձակելու ուղղությամբ։

Ներկայում Ցխինվալիի բանտում և մեկուսարանում են գտնվում Վրաստանի 8 քաղաքացիներ, որոնց թվում է նաև 25-ամյա Լաշա Խեթերելին, ով ձերբակալվել է հուլիսի 5-ին՝ օկուպացված Դիսևի գյուղի մոտ։

Հարավային Օսիայի դե ֆակտո սահմանապահ ծառայության տվյալներով՝ 2023 թվականի առաջին վեց ամիսներին «պետական ​​սահմանի» տարբեր հատվածներում ձերբակալվել է 185 իրավախախտ։ Նրանցից 121-ը տուգանվել է, 3-ը առանց՝ տուգանքի վտարվել «Հանրապետությունից», 46-ը՝ նախազգուշացվել է, իսկ 7-ի նկատմամբ քրեական գործ է հարուցվել։