ახალი ამბები

ე.წ. სამხრეთ ოსეთის სახელმწიფო უსაფრთხოების კომიტეტის თანახმად, პაატა ბებნაძემ, ბექა ბეგიაშვილმა, მამუკა გელიაშვილმა, ტარიელ ქუჯოშვილმა და გოგა უზნაძემ, რომლებიც გორის მუნიციპალიტეტის სოფელ ახრისის მცხოვრებლები არიან, „სახელმწიფო საზღვარი“ ნასვამ მდგომარეობაში, განზრახ გადაკვეთეს.

„სამხრეთ ოსეთის სასაზღვრო ორგანოების თანამშრომლებმა კანონდამრღვევები 6 ივლისს ცხინვალის რაიონის დასახლებულ პუნქტ ღრომის მიმდებარე ტერიტორიაზე დააკავეს. ორშაბათს, 10 ივლისს, „სახელმწიფო საზღვრის შესახებ“ სამხრეთ ოსეთის რესპუბლიკის კანონის შესაბამისად, ისინი რესპუბლიკიდან იქნენ გაძევებულნი“, - ნათქვამია დე ფაქტო ხელისუფლების განცხადებაში.

საქართველოს მოქალაქეების მორიგი უკანონო დაკავების შესახებ 7 ივლისს გახდა ცნობილი, როდესაც პარლამენტში მყოფმა სახელმწიფო უსაფრთხოების სამსახურის უფროსის პირველმა მოადგილემ, ალექსი ბატიაშვილმა ამის შესახებ განაცხადა.

„მინდა, ერთი სამწუხარო ფაქტი გითხრათ, რომ დღეს დილით მოხდა კიდევ ექვსი ჩვენი თანამოქალაქის უკანონო დაკავება საოკუპაციო ძალების მიერ. გააქტიურებულია ცხელი ხაზი, ჩართული არიან ჩვენი საერთაშორისო პარტნიორები. დადასტურებულია მათი დაკავება და ველოდებით შემდგომ მოვლენების განვითარებას. ყველაფერს გავაკეთებთ, რომ ეს ადამიანები რაც შეიძლება მალე დაუბრუნდნენ თავიანთ ოჯახებს“, - უთხრა ბატიაშვილმა დეპუტატებს.

როგორც სუს-ში აცხადებენ, ცენტრალური ხელისუფლება, საერთაშორისო პარტნიორებთან ერთად, განაგრძობს აქტიურ მუშაობას ოკუპირებულ ტერიტორიებზე უკანონო პატიმრობაში მყოფი საქართველოს ყველა მოქალაქის გასათავისუფლებლად.

დღეისთვის ცხინვალის ციხესა და იზოლატორში საქართველოს 8 მოქალაქე იმყოფება, მათ შორის არის 5 ივლისს ოკუპირებული სოფელ დისევის მიმდებარედ დაკავებული 25 წლის ლაშა ხეთერელიც.

დე ფაქტო სამხრეთ ოსეთის სასაზღვრო სამსახურის მონაცემებით, 2023 წლის პირველ ექვს თვეში, „სახელმწიფო საზღვრის“ სხვადასხვა მონაკვეთზე 185 სამართალდამრღვევი დააკავეს. მათგან 121 დააჯარიმეს, 3 - ჯარიმის გარეშე „რესპუბლიკიდან“ გააძევეს, 46 - გააფრთხილეს, ხოლო 7-ის წინააღმდეგ სისხლის სამართლის საქმეა აღძრული.