Վրաստանի յուրաքանչյուր վեցերորդ քաղաքացին մտածում է արտագաղթի մասին. հետազոտություն

Հարցվածների մեծամասնության՝ 34%-ի ֆինանսական հնարավորությունները 5 տարի առաջվա համեմատ վատացել են, իսկ 35%-ի հնարավորությունները նույնն են։ 28%-ն ասում է, որ այժմ ավելի լավ ֆինանսական վիճակ ունի, քան 5 տարի առաջ, մնացածը «չգիտեն»։

Բնակչությունը շարունակում է երկրի ամենամեծ մարտահրավերներից նշել գների աճը, աշխատատեղերն ու աղքատությունը։ Վրաստանի տնտեսական վիճակը «վատ» է գնահատում հարցվածների 48%-ը, այսինքն՝ գրեթե յուրաքանչյուր երկրորդ քաղաքացին։ 9 տոկոսն ասում է, որ տնտեսական վիճակը լավ է, իսկ 42 տոկոսը գնահատում է «միջին»։ Միաժամանակ 50 տոկոսը վստահ չէ, որ կառավարությունը կկարողանա լուծել տնտեսական խնդիրները։

Հետազոտությունը հիմնված է մարտի 17-23-ն ընկած ժամանակահատվածում Վրաստանի չափահաս բնակչության (բացի օկուպացված տարածքներից) շրջանում անցկացված համազգային հեռախոսային հարցման արդյունքների վրա։ Հարցումը ներառում է 1 032 հարցազրույց։ Հարցման միջին սխալի սահմանը +/- 2 տոկոս է:

Վիճակագրության ազգային ծառայության տվյալներով՝ 2022 թվականին արտագաղթողների թիվն աճել է. Վրաստանի 100 802 քաղաքացի լքել է երկիրը։ Նույն ժամանակահատվածում Վրաստան է վերադարձել 54 405 քաղաքացի։