საქართველოს ყოველი მეექვსე მოქალაქე ემიგრაციაში წასვლაზე ფიქრობს - კვლევა

გამოკითხულთა უმრავლესობის, ანუ 34%-ის ფინანსური შესაძლებლობები, 5 წლის წინანდელთან შედარებით, გაუარესებულია, ხოლო 35%-ის იგივეა. 28% ამბობს, რომ ახლა უკეთესი ფინანსური მდგომარეობა აქვს, ვიდრე 5 წლის წინ ჰქონდა, დანარჩენმა ნაწილმა „არ იცის“.

მოსახლეობა ქვეყანაში არსებულ ყველაზე დიდ გამოწვევებს შორის კვლავ ფასების ზრდას, სამუშაო ადგილებსა და სიღარიბეს ასახელებს. გამოკითხულთა 48%, ანუ თითქმის ყოველი მეორე მოქალაქე, საქართველოს ეკონომიკურ მდგომარეობას „ცუდად“ აფასებს. 9% ამბობს, რომ ეკონომიკური მდგომარეობა კარგია, 42%-ს აზრით კი - „საშუალო“. ამასთან, 50% არ არის დარწმუნებული, რომ მთავრობა ეკონომიკური პრობლემების მოგვარებას შეძლებს.

კვლევა 17-23 მარტის პერიოდში ქვეყნის მასშტაბით ჩატარებულ, საქართველოს ზრდასრული მოსახლეობის სატელეფონო გამოკითხვის შედეგებს ემყარება (ოკუპირებული ტერიტორიების გამოკლებით). გამოკითხვა 1032 ინტერვიუს მოიცავს. კვლევის საშუალო ცდომილების ზღვარი +/- 2 პროცენტია.

სტატისტიკის ეროვნული სამსახურის მონაცემებით, 2022 წელს ემიგრანტების რაოდენობა გაიზარდა - საქართველოს 100 802-მა მოქალაქემ ქვეყანა დატოვა. ამავე პერიოდში, საქართველოში 54 405 მოქალაქე დაბრუნდა.